Cwnsela a Therapïau Seicolegol ar gyfer Iselder
Mae’r Gwasanaeth Cwnsela a Therapïau Seicolegol ar gyfer Iselder (CPTD) yn darparu Therapïau Seicolegol/Cwnsela un i un ar gyfer y cleifion hynny y nodir bod ganddynt symptomau sy’n gyson â hwyliau isel/iselder.
Mae’r gwasanaeth yn cynnig ymyriadau therapiwtig yn seiliedig ar dystiolaeth ac ar anghenion defnyddiwr y gwasanaeth. Mae’r rhain yn cynnwys:
- Cwnsela ar gyfer Iselder
- Therapi Rhyngbersonol ar gyfer Iselder
Sut fyddwn i’n cael fy atgyfeirio?
Mae’r CPTD yn derbyn atgyfeiriadau gan wasanaethau Iechyd Meddwl Rhan 1 yn dilyn asesiad cychwynnol.
Mae hyn yn golygu, yn dilyn apwyntiad gyda’ch meddyg teulu, y byddant yn eich atgyfeirio am asesiad gyda’r Gwasanaeth Cymorth Iechyd Meddwl Sylfaenol (PMHSS) a allai nodi angen am Gwnsela/Therapi Seicolegol ar gyfer hwyliau isel/iselder. Os mai dyma’r sefyllfa, cewch eich atgyfeirio at CPTD.
Beth sy’n digwydd ar ôl atgyfeirio?
Bydd CPTD yn adolygu eich manylion atgyfeirio. Os yw’n briodol, byddwch yn cael eich ychwanegu at ein rhestr aros a, maes o law, byddwn yn cysylltu â chi i drefnu apwyntiad cychwynnol.
Beth sy’n digwydd yn yr apwyntiad wyneb yn wyneb hwn?
Byddwch yn cwrdd â chwnsleydd/therapydd o’r tîm a fydd yn asesu eich anghenion.
Os teimlir y gallwn gynnig ymyriad addas i chi, bydd hyn yn cael ei drefnu yn ystod yr asesiad.
Os nad ydych chi a/neu’r cwnselydd/therapydd yn credu bydd yr hyn y gallwn ei gynnig yn ddefnyddiol, byddant yn helpu i ddod o hyd i lwybr arall.
Weithiau bydd angen i’r cwnselydd/therapydd drafod yr asesiad gyda Goruchwyliwr neu Arweinydd Gwasanaeth er mwyn gwneud penderfyniad. Fe gewch chi wybod am hyn cyn gynted â phosibl.
Pryd a ble mae sesiynau’n cael eu cynnal?
Mae CPTD yn wasanaeth “digidol yn gyntaf” sy’n cynnig mynediad at ymgynghoriadau fideo ar-lein trwy Attend Anywhere. Os oes angen, gellir cynnig apwyntiadau wyneb yn wyneb i ddefnyddwyr y gwasanaeth mewn lleoliadau amrywiol yng Nghaerdydd a’r Fro.
