Gwybodaeth i Rieni

Yr Uned Gofal Dwys i Blant (PICU) yw'r Uned Gofal Dwys cyntaf i Blant yng Nghymru, a'r unig un o'i math, ac mae'n gofalu am blant o'u genedigaeth i 16 mlwydd oed. Yn ystod arhosiad eich plentyn, byddant dan ofal Meddyg Ymgynghorol Arbenigol profiadol ym maes Gofal Dwys i Blant.

Bob dydd, byddwch yn gallu siarad â'r tîm o feddygon sy'n gofalu am eich plentyn. Mae meddyg ar ddyletswydd 24 awr y dydd. Bydd nyrs plant gymwysedig sydd â phrofiad o ofal dwys yn gofalu am eich plentyn ar bob shifft. Mae dau brif shifft - dyletswydd dydd a dyletswydd nos.

Mae dau rownd ward gan feddygon bob dydd, am 8.30 am ac am 4.30 pm.
Mae nyrsys yn trosglwyddo am 7.30 am ac am 7.30 pm.

Bydd pob aelod o dîm PICU yn eich cefnogi chi ac yn rhoi gwybod i chi am gyflwr a gofal parhaus eich plentyn. Byddwch yn gweld llawer o dimau sy'n ymweld, fel Ffisiotherapyddion a staff mewn gwisgoedd eraill, a fydd yn helpu i ddarparu gofal i'ch plentyn. Os nad ydych yn siwr pwy yw rhywun, gofynnwch i aelod o'r tîm nyrsio.

Bydd eich plentyn yn cael ei nyrsio yn un o 8 o ardaloedd gwely yn y PICU. Bydd llawer o weiars a thiwbiau wedi'u cysylltu â'ch plentyn. Mae'r weiars yn darparu gwybodaeth bwysig am eich plentyn i'r staff meddygol a nyrsio sy'n gofalu amdano, ac mae'r tiwbiau yn galluogi staff i roi meddyginiaeth y mae ar eich plentyn ei hangen i'w gadw ynghwsg ac yn ddi-boen, ac i'w helpu i wella.

Gall amgylchedd y PICU achosi llawer o straen a gallech deimlo bod peiriannau, goleuadau llachar a sŵn anghyfarwydd o'ch cwmpas ym mhobman. Am y rhesymau hyn, gallech deimlo nad ydych yn gallu ymdopi neu helpu eich plentyn.

Gofalu am eich plentyn

Mae sawl ffordd i chi barhau i gyflawni eich rôl fel rhiant i'ch plentyn a byddwn yn eich annog ac yn eich helpu i wneud pan fyddwch yn barod. Darllenwch ein Canllaw defnyddiol i Rieni am ragor o gyngor ar sut i ymdopi eich hunan, a gwybodaeth am sut i helpu brodyr a chwiorydd.

Bydd lefel y gofal y teimlwch y gallwch ei roi yn dibynnu arnoch chi. Mae llawer o rieni'n dymuno helpu i olchi eu plentyn neu newid ei gewyn, mae eraill yn hapus i wylio hyd nes bydd rhai o'r tiwbiau a'r weiars wedi'u tynnu i ffwrdd.

Bach iawn o ddillad bydd eich plentyn yn ei wisgo tra bydd yn y PICU, fel y gall y nyrs arsylwi'r plentyn yn fanwl. Efallai byddwch chi am ddod â hosannau i'ch baban, neu eitemau penodol sydd o gysur i'ch plentyn gartref.

Mae'n siwr y bydd eich plentyn yn gallu'ch clywed chi, hyd yn oed os bydd wedi cael meddyginiaeth i wneud iddo gysgu. Felly, gall gael llawer o gysur o sŵn eich llais neu gyffyrddiad eich llaw. Efallai yr hoffech ddod â hoff degan neu flanced i mewn, darllen i'ch plentyn neu chwarae ei hoff gerddoriaeth. Cofiwch mai chi sy'n adnabod eich plentyn orau.

Os ydych chi'n bwydo'ch baban ar y fron, efallai byddwch am dynnu llaeth o'r fron ar ei gyfer ac mae offer ar gael i chi wneud hyn. Bydd y nyrs yn rhoi'r wybodaeth angenrheidiol i chi. Yna, gall eich llaeth gael ei roi i'ch baban trwy un o'r tiwbiau arbennig.

Gofalu amdanoch eich hun

Gofalu amdanoch eich hun yw un o'r ffyrdd gorau y gallwch helpu eich plentyn. Dyma amser o straen enfawr i chi ac mae'n bwysig i chi gadw'n gryf yn gorfforol ac yn emosiynol i'ch plentyn.

Mae ystafelloedd aros gerllaw'r PICU i chi eu defnyddio yn ystod eich arhosiad, gyda theledu ynddynt. Mae nifer o leoedd i fwyta yn yr ysbyty a bydd staff yn rhoi gwybod i chi sut i ddod o hyd iddynt. Hefyd, mae nifer o siopau yn y Cyntedd.

Cofiwch fwyta ac yfed – efallai na fydd awydd bwyd arnoch, ond bydd angen egni arnoch, felly bwytewch ychydig, yn aml.
Cymerwch seibiau rheolaidd i ffwrdd o'r uned – gall fod yn anodd gadael eich plentyn am gyfnodau byr, ond bydd yr amser hwn yn eich helpu i gael eich cefn atoch. Bydd y nyrs sy'n gofalu am eich plentyn yn aros gyda'r plentyn ac yn cysylltu â chi os bydd angen.
Ceisiwch gael digon o orffwys a chwsg. Mae llety i rieni ar gael yn yr ysbyty, felly gofynnwch os hoffech aros a bydd y nyrs sy'n gofalu am eich plentyn yn ceisio trefnu hyn i chi.
Defnyddiwch y cymorth sydd ar gael i chi, fel teulu a ffrindiau. Yn ystod cyfnodau fel hyn, mae pobl yn aml yn gwerthfawrogi cael gwybod beth allant ei wneud i helpu.

Help a Chymorth i Chi

Mae llawer o bobl yn yr ysbyty i'ch helpu a'ch cynorthwyo chi. Gall staff y PICU roi gwybodaeth berthnasol i chi os bydd angen eu cymorth arnoch.

Nyrs cymorth rhieni - gall y nyrs sy'n gofalu am eich plentyn roi i chi'r wybodaeth y mae ei hangen arnoch, neu gysylltu â nhw ar eich rhan
Mae Caplan yr Ysbyty ar gael bob amser os hoffech gael rhywun i siarad â nhw. Nid oes angen i chi fod yn grefyddol na mynd i'r eglwys i wneud hynny.
Mae capel yr ysbyty wedi'i leoli ar 5ed llawr Bloc B, Ysbyty Athrofaol Cymru, ac mae'n fan tawel i chi gael saib neu ychydig o amser tawel. Mae ar agor 24 awr y dydd, 7 niwrnod yr wythnos. Hefyd, gallwn drefnu bedyddio neu fendithio'ch plentyn, os hoffech wneud hyn. Gofynnwch i ni unrhyw bryd, fel y gallwn drefnu bod yr arweinydd crefyddol o'ch dewis yn dod lawr i'r uned.
Gweithiwr cymdeithasol ysbyty
Gwasanaeth dehongli iaith
Mae nifer o aelodau staff Cymraeg eu hiaith yn nhîm y PICU os Cymraeg yw eich mamiaith. Edrychwch am y logo ar wisg y staff.