Paratoi ar gyfer fy Nhriniaeth ac Adferiad
Os ydych chi neu rywun annwyl wedi trefnu i gael llawdriniaeth a bod gennych unrhyw gwestiynau neu bryderon am y driniaeth, mae croeso i chi gysylltu â'n Tîm Pryderon pwrpasol drwy ffonio 029 218 36318 neu anfon e-bost at concerns@wales.nhs.uk.
Os ydych yn aros am lawdriniaeth neu driniaeth ar hyn o bryd, gall paratoi'n effeithiol wneud gwahaniaeth sylweddol i'ch profiad o driniaeth a'ch adferiad.
Efallai eich bod yn y cyfnod cynnar o feddwl am gael llawdriniaeth, neu efallai eich bod wedi aros yn hir i gael llawdriniaeth. Waeth beth yw eich sefyllfa, mae llawer o bethau y gallwch chi eu gwneud er mwyn paratoi, bod yn barod, a chael canlyniad mwy llwyddiannus a gwell adferiad.
Beth yw’r manteision o baratoi ar gyfer triniaeth neu lawdriniaeth?
Dyma rai o’r manteision sy’n deillio o baratoi’n dda ar gyfer llawdriniaeth:
- llai o gymhlethdodau a sgileffeithiau ar ôl y llawdriniaeth
- llai o amser yn yr ysbyty a dychwelyd adref yn gynt
- dychwelyd yn gynt i’ch lefel iechyd a ffordd o fyw blaenorol
- mwy o egni, llai o flinder, a gwell iechyd meddwl
- mwy o reolaeth dros benderfyniadau ynghylch gofal.
Ar wefan Cadw Fi’n Iach mae clinigwyr o Fwrdd Iechyd Prifysgol Caerdydd a’r Fro wedi dod â gwybodaeth a chyngor ynghyd am yr hyn y gallwch ei wneud i baratoi eich hun ar gyfer eich triniaeth yn y ffordd orau, a’r hyn y gallwch ei wneud yn ystod eich triniaeth er mwyn sicrhau’r canlyniadau gorau posibl.