Myfyrwyr prifysgol blwyddyn gyntaf yn cael eu hannog i gael y brechlyn MenB

11 Medi 2026

Mae myfyrwyr dan 25 oed sy'n dechrau eu blwyddyn gyntaf yn y brifysgol yn cael cynnig brechlyn i'w hamddiffyn rhag meningitis B (MenB).

Yn gynharach eleni, lansiodd Llywodraeth y DU raglen frechu frys i amddiffyn pobl ifanc rhag MenB, haint bacterol sy'n gallu achosi salwch difrifol, gan gynnwys llid yr ymennydd, septisemia a sepsis.

Roedd hyn yn dilyn brigiad o achosion difrifol o glefyd meningococol ymledol yng Nghaint sydd hyd yn hyn wedi arwain at 21 o achosion wedi'u cadarnhau a dwy farwolaeth.

Mae myfyrwyr sy'n dechrau yn y brifysgol fel myfyrwyr israddedig am y tro cyntaf mewn mwy o berygl o haint MenB gan eu bod yn cymysgu mwy â phobl ac yn byw mewn llety a rennir.

Ym mis Medi a mis Hydref, bydd tîm brechu Bwrdd Iechyd Prifysgol Caerdydd a'r Fro yn ymweld ag amrywiaeth o leoliadau addysg uwch neu addysg bellach breswyl i gynnig y brechiad MenB i fyfyrwyr.

Rhoddir y brechlyn fel dau ddos, pedair wythnos ar wahân, i sicrhau amddiffyniad llawn.

Dyma restr o'r holl glinigau brechu galw heibio sy'n cael eu cynnal. Does dim angen apwyntiad - galwch heibio:

Dywedodd Dr Claire Beynon, Cyfarwyddwr Gweithredol Iechyd y Cyhoedd yn BIP Caerdydd a'r Fro: “Mae dechrau yn y brifysgol yn gyfnod cyffrous, ac mae cael eich brechlyn meningitis B yn ystod Wythnos y Glas yn gam syml ond pwysig i'ch helpu i amddiffyn eich hun. Gall meningitis B ddatblygu'n gyflym iawn a gall achosi salwch difrifol, gan gynnwys llid yr ymennydd a sepsis, gyda chanlyniadau a allai newid bywyd neu fod yn angheuol.

“Gall myfyrwyr sy'n byw ac yn cymdeithasu'n agos at ei gilydd fod mewn mwy o berygl o ledaenu bacteria meningococol, felly mae cael y brechlyn pan gaiff ei gynnig yn ffordd bwysig o leihau'r risg honno.

“A does dim rhaid iddo fod yn rhwystr i fwynhau dechrau bywyd prifysgol - mae cael eich brechu yn ystod Wythnos y Glas yn golygu y gallwch chi wneud y cam iechyd pwysig hwn wrth i chi ymgartrefu, cwrdd â phobl newydd a manteisio i'r eithaf ar bopeth sydd gan y brifysgol i'w gynnig.”

Mae'r brechlyn MenB ar gael i'r rhai a aned ar neu ar ôl 21/07/2001 (sy'n troi'n 25 ar neu ar ôl 21/07//2026) ac sy'n mynychu addysg uwch neu addysg bellach breswyl am y tro cyntaf o dymor yr hydref 2026. Dewch â thystiolaeth eich bod yn fyfyriwr israddedig yn eich blwyddyn gyntaf, er enghraifft eich llythyr cynnig.

Mae'r brechiad MenB hefyd yn cael ei gynnig i bawb 17 a 18 oed a aned rhwng 01/09/2007 a 31/08/2008.