Beth yw'r sail gyfreithiol i brosesu fy nata personol

Yn y lle cyntaf, bydd eich cyflogwr yn dibynnu ar y seiliau cyfreithiol canlynol o dan y Rheoliad Diogelu Data Cyffredinol (GDPR) i roi eich manylion i’r Bwrdd Iechyd Lleol er mwyn iddo gynnig brechiad i chi:

• Erthygl 6(1)(c) – Mae prosesu yn angenrheidiol er mwyn cydymffurfio â’r rhwymedigaeth gyfreithiol (Iechyd a Diogelwch) y mae’r Rheolwr (eich cyflogwr) yn ddarostyngedig iddo.

• Erthygl 6(1)(f) – Mae prosesu yn angenrheidiol at ddibenion bodloni diddordebau dilys y rheolwr neu drydydd parti, heblaw lle mae diddordebau neu hawliau a rhyddid sylfaenol gwrthrych y data y mae angen diogelu data personol arno yn drech na’r diddordebau hynny, yn enwedig lle y mae gwrthrych y data yn blentyn.  Mae Prawf Diddordebau Dilys wedi cael ei gymhwyso yn rhan o’r Asesiad o’r Effaith ar Ddiogelu Data er mwyn cadarnhau bod y sail gyfreithiol hon wedi’i chymhwyso.

Unwaith y bydd y wybodaeth hon gyda’r Bwrdd Iechyd, dyma’r sail gyfreithiol y bydd yn ei defnyddio i brosesu eich data personol at ddibenion brechu o dan y Rheoliad Diogelu Data Cyffredinol:

• Erthygl 6(1)(e) – Mae’r dasg yn cael ei chyflawni er budd y cyhoedd neu wrth arfer yr awdurdod swyddogol sydd wedi ei roi i’r rheolwr (y Bwrdd Iechyd).

Ar gyfer data o gategorïau arbennig (data iechyd) bydd angen sail gyfreithiol ychwanegol, ac yn yr achos hwn mae dwy yn berthnasol:

• Erthygl 9(2)(h) – Darparu meddygaeth alwedigaethol neu ataliol, triniaeth neu ofal iechyd neu gymdeithasol, neu reoli systemau gofal iechyd neu gymdeithasol.

• Erthygl 9(2)(i) – Mae’n rhaid i brosesu’r data fod yn angenrheidiol er lles y cyhoedd ym maes iechyd cyhoeddus (e.e. diogelu rhag bygythiadau trawsffiniol difrifol i iechyd neu sicrhau safonau uchel o ofal a diogelwch mewn gofal iechyd, cynnyrch meddyginiaethol neu ddyfeisiau meddygol).