Tîm Llawdriniaeth Thorasig Caerdydd yn Derbyn Cydnabyddiaeth Genedlaethol am Gefnogi Meddygon yr Ymddiriedolaeth

16 Gorffennaf 2026

Mae tîm Llawdriniaeth Thorasig Ysbyty Athrofaol Cymru wedi cael cydnabyddiaeth genedlaethol ar ôl derbyn y wobr am yr “Adran Orau o ran Cefnogaeth i Feddygon yr Ymddiriedolaeth” yng Nghyfarfod Blynyddol 2026 y Gymdeithas Llawdriniaeth Gardiothorasig (SCTS) yn Belfast. 

Mae'r wobr yn arbennig o ystyrlon gan fod meddygon yr ymddiriedolaeth sy'n gweithio mewn adrannau cardiothorasig ledled y DU ac Iwerddon yn pleidleisio drosti. Mae'n cydnabod adrannau sy'n gwneud mwy na'r disgwyl i gefnogi meddygon drwy hyfforddiant, mentora a datblygu gyrfa. 

I dîm Llawdriniaeth Thorasig Caerdydd, mae'r gydnabyddiaeth yn adlewyrchu blynyddoedd o waith yn canolbwyntio ar greu diwylliant cefnogol a chynhwysol, lle rhoddir cyfleoedd cyfartal i bob meddyg dyfu, waeth beth fo'u llwybr hyfforddi. 

O fewn y GIG, mae meddygon yr ymddiriedolaeth yn chwarae rhan hanfodol wrth ddarparu gofal i gleifion a chefnogi gwasanaethau, ond ar lefel genedlaethol, gallant weithiau wynebu llai o gyfleoedd ar gyfer hyfforddiant strwythuredig a datblygiad gyrfa o gymharu â meddygon ar raglenni hyfforddi traddodiadol y Ddeoniaeth. 

Mae tîm Caerdydd wedi gweithio i herio'r canfyddiad hwnnw drwy feithrin yr hyn a ddisgrifiant yn ddiwylliant o roi "hyfforddiant yn gyntaf", gan sicrhau bod Meddygon yr Ymddiriedolaeth yn cael eu hintegreiddio'n llawn i'r adran ac yn cael cymorth i ddatblygu eu sgiliau clinigol, academaidd a llawfeddygol. 

Mae'r tîm o feddygon ymgynghorol – Miss Malgorzata Kornaszewska, Mr Ainis Pirtnieks, Mr Vasileios Valtzoglou a Mr Tom Combellack – wedi canolbwyntio ar greu amgylchedd lle mae cyfleoedd addysgol yn seiliedig ar uchelgais a gallu yn hytrach na theitl swydd neu lwybr hyfforddi. 

Mae hyn yn cynnwys darparu profiad ystyrlon yn y theatr lawdriniaethau, cyfleoedd rheolaidd i ddysgu, mentora a chyfranogiad mewn prosiectau ymchwil, gan helpu meddygon i feithrin hyder a phrofiad yn y maes arbenigol. 

Rhoddwyd cymorth yn arbennig ar gyfer meddygon sy'n dilyn y 'Llwybr Portffolio’ (a elwid gynt yn CESR); llwybr amgen yw hwn sy'n galluogi meddygon profiadol i weithio tuag at gofrestru fel arbenigwyr y tu allan i gynlluniau hyfforddi cenedlaethol traddodiadol. 

I lawer o feddygon, gall y Llwybr Portffolio fod yn broses gymhleth a heriol, sy'n gofyn am dystiolaeth helaeth o gymwyseddau, profiad llawfeddygol a datblygiad proffesiynol. Mae tîm Llawdriniaeth Thorasig Caerdydd wedi datblygu dull strwythuredig o gefnogi meddygon drwy'r llwybr hwn, gan gynnig mentoriaeth wedi'i theilwra, arweiniad ar gasglu tystiolaeth, cyfleoedd ymchwil a chyfrifoldeb clinigol cynyddol. 

Mae'r adran yn credu bod y dull hwn nid yn unig o fudd i feddygon unigol, ond hefyd yn cryfhau'r gweithlu yn y dyfodol o fewn y GIG drwy helpu i gadw clinigwyr dawnus a darparu llwybrau cliriach ar gyfer datblygu gyrfa. 

Wrth sôn am y wobr, dywedodd aelodau'r tîm eu bod yn hynod falch o weld y adran yn cael ei chydnabod gan y meddygon eu hunain, gan ei disgrifio fel adlewyrchiad o'r diwylliant cefnogol sydd wedi'i feithrin o fewn y gwasanaeth. 

Mae'r gydnabyddiaeth hefyd yn tynnu sylw at bwysigrwydd ehangach buddsoddi mewn datblygiad a llesiant staff ar adeg pan fo gwasanaethau gofal iechyd ledled y DU yn parhau i wynebu pwysau sylweddol o ran y gweithlu. 

Yn ogystal â'i gwaith ym maes addysg a hyfforddiant, mae Adran Llawdriniaeth Thorasig Caerdydd wedi parhau i ennill cydnabyddiaeth genedlaethol am arloesedd a gofal cleifion. Mae'r adran hefyd wedi'i rhoi ar y rhestr fer yn ddiweddar ar gyfer Gwobrau Canser Moondance 2026 yn y categori "Gwella Profiad Cleifion". 

Mae gwobr yr SCTS yn atgyfnerthu enw da cynyddol Caerdydd fel canolfan ragoriaeth ar gyfer hyfforddiant a chymorth ym maes llawdriniaeth thorasig, gan dynnu sylw ar yr un pryd at y cyfraniad pwysig y mae Meddygon yr Ymddiriedolaeth yn ei wneud ar draws y GIG bob dydd.