Tîm llawdriniaeth ar y galon CAF yn mewnblannu dwythell falf aortig Konect Resilia Edwards Lifesciences am y tro cyntaf yng Nghymru

14 Ebrill 2026

Ym mis Chwefror 2026, gwnaeth yr Athro Indu Deglurkar, Llawfeddyg Ymgynghorol y Galon, a'i thîm ym Mwrdd Iechyd Prifysgol Caerdydd a'r Fro gynnal y llawdriniaeth amnewid aorta esgynnol Bio-Bentall Konect Resilia Edwards Lifesciences gyntaf yng Nghymru.

© Edwards Lifesciences

Yr aorta yw'r rhydweli mwyaf yn y corff ac mae ynghlwm wrth y galon. Mae llawdriniaeth Bentall yn amnewid rhannau diffygiol o'r aorta, gan gynnwys gwreiddyn yr aorta, falf yr aorta, a'r aorta esgynnol.

Mewn llawdriniaeth fiolegol/Bio-Bentall, mae hyn yn defnyddio meinwe newydd o anifail, fel mochyn, neu fuwch.

Mae Edwards Lifesciences wedi datblygu ymhellach feinwe pericardaidd buchol yn feinwe “Resilia”, gan helpu i amddiffyn a chadw’r meinweoedd ac ymestyn cyfanrwydd strwythurol y falf ar ôl llawdriniaeth.

Mae'n debygol y bydd angen dwythell falf fiolegol ar gleifion sydd â chlefydau'r falf aortig ar y cyd ag anewrysm (chwydd yn yr aorta) neu sydd â dyraniad aortig.

Cleifion iau, a phobl sydd eisiau byw bywyd egnïol heb ddibynnu ar deneuwyr gwaed yw'r ymgeiswyr delfrydol ar gyfer y dechnoleg hon.

Wedi'i chymeradwyo i'w defnyddio yn y DU ym mis Hydref 2025, mae'r Resilia Konect yn Ddwythell Falf Aortig wedi'i chydosod ymlaen llaw ac mae'n lleihau cymhlethdod y llawdriniaeth.

Yn flaenorol, nid oedd gan lawfeddygon opsiwn wedi'i gydosod ymlaen llaw a byddent wedi gorfod cydosod y ddwythell â llaw.

Yn y tymor byr, mae canlyniadau'r cleifion wedi bod yn rhagorol gyda chanlyniadau hirdymor i'w hadrodd yn y dyfodol.

Yn dilyn adferiad rhagorol ar ôl llawdriniaeth, cafodd y claf ei ryddhau ar ôl chwe diwrnod.

Yn y dyfodol, rydym yn gobeithio cynnig dwythell Bio-Bentall Konect Resilia i gleifion ifanc sydd angen gwreiddyn aortig newydd gan ddewis falf fiolegol yng Nghaerdydd a'r Fro.

Gobeithio y bydd hyn yn helpu i leihau'r angen i ail-ymyrryd â falf strwythurol yn y dyfodol.

Dywedodd yr Athro Deglurkar, sy'n cynnal ystod eang o lawdriniaethau agored cymhleth ar y galon: “Mae’n wych cael dwythell Gwreiddyn Aortig ac Aortig Esgynnol fiolegol wedi’i chydosod ymlaen llaw sy’n symleiddio camau’r llawdriniaeth a gobeithio y bydd y claf yn elwa ar ganlyniadau hirdymor rhagorol.

“Cymeradwyodd Cyd-bwyllgor Comisiynu GIG Cymru fy nghais am gyllid arbennig ar gyfer y ddwythell falf fiolegol hon. Rwy'n gobeithio y bydd ar gael yn rheolaidd i gleifion ifanc sydd angen y llawdriniaeth gymhleth hon.”

Mae'r Bwrdd Iechyd yn falch o fod ar flaen y gad o ran technolegau newydd a thechnolegau sy'n datblygu ac mae'n gyffrous i gymryd rhan yn y datblygiadau diweddaraf