"Mae'n helpu fi i deimlo'n hyderus ac yn hapus" | Estyniad sylweddol i ganolfan iechyd meddwl i bobl ifanc y Barri

23 Mawrth 2026

Cafodd canolfan iechyd meddwl a lles i bobl ifanc 11-18 oed yng nghanol y Barri estyniad yn ddiweddar, gan alluogi'r gwasanaeth i gefnogi mwy o bobl ifanc ledled y Barri a Bro Morgannwg. 

Datblygwyd yr Hangout gan yr elusen iechyd meddwl Platfform, mewn partneriaeth â Bwrdd Iechyd Prifysgol Caerdydd a'r Fro. Mae'r gwasanaeth mynediad agored, sydd ar gael yng Nghaerdydd a'r Barri, yn cynnig cymorth iechyd meddwl wrth alw heibio, sesiynau 1-1 wedi'u hamserlennu a grwpiau sy'n canolbwyntio ar les. Mae'n rhoi lle diogel a hygyrch i bobl ifanc lle gallant feithrin hyder, datblygu sgiliau ymdopi a theimlo eu bod yn cael eu cefnogi yn ystod cyfnodau anodd. 

Agorodd yr Hangout yn y Barri ym mis Tachwedd 2024 ac ers hynny mae wedi dod yn wasanaeth hynod bwysig yn y gymuned. 

Dywedodd un bachgen 15 oed sydd wedi bod yn defnyddio'r gwasanaeth yn rheolaidd dros y flwyddyn ddiwethaf: “Mae pawb yn yr Hangout yn garedig ac yn gymdeithasol iawn ac maen nhw wedi gwneud i mi eisiau mynd allan yn amlach. Mae'r staff bob amser yn gwneud i mi deimlo fy mod yn cael fy nghynnwys.” 

“Rwy'n hoffi cwrdd â phobl newydd ac rwy'n hoff o awyrgylch y gofod cymdeithasol. Rwyf hefyd yn hoffi'r gefnogaeth maen nhw'n ei chynnig i mi.” 

Dechreuodd plentyn 12 oed arall ddefnyddio'r gwasanaeth ar ôl clywed amdano gan ffrindiau. “Mae'n helpu fi i deimlo'n hyderus ac yn hapus” meddai. 

Yn ystod yr wythnosau diwethaf, mae The Hangout wedi cael ei adnewyddu a'i ehangu diolch i brosiect a ariannwyd gan grŵp Clwstwr Gofal Sylfaenol Canol y Fro. Mae'r gofod newydd yn cynnwys ystafelloedd therapiwtig ar gyfer cefnogaeth 1-1, ardal aros dawel a heddychlon wedi'i chynllunio gyda niwroamrywiaeth mewn golwg, a lle hyblyg i grwpiau ymgynnull ar gyfer gweithgareddau lles. Mae'r bobl ifanc wedi cael eu hystyried drwy gydol y broses ac maen nhw hyd yn oed wedi cyfrannu at y dyluniad effaith graffiti, i ychwanegu eu cyffyrddiadau personol at y gofod. 

Mae'r dyluniad newydd yn fwy cynhwysol i bobl ifanc niwroamrywiol, gydag ardal dawel, synhwyraidd yn eu croesawu. Nod ailddylunio'r ardal groeso hon yw sicrhau nad yw pobl ifanc, yn enwedig pobl ifanc niwroamrywiol, yn teimlo wedi'u gorlethu wrth iddynt fynd i mewn i'r adeilad am y tro cyntaf i geisio cymorth. 

Dywedodd Dr James Martin, arweinydd grŵp Clwstwr Gofal Sylfaenol Canol y Fro: “Wrth weithio yng Nghanol y Fro, rydym yn gweld pobl ifanc bob dydd yn wynebu heriau sylweddol gyda'u hiechyd meddwl ac mae'r gwaith a wneir gan Platfform yn The Hangout yn ysbrydoledig iawn. Dylai gallu ehangu'r cymorth sydd ar gael i bobl ifanc, mewn ffordd gyfeillgar, hygyrch a chroesawgar, gael effaith wirioneddol ar fywydau pobl sy'n byw yn ardal Canol y Fro.” 

Yn ogystal dywedodd Bethan Case, Rheolwr Gwasanaeth Platfform yn The Hangout: “Rydym yn hynod ddiolchgar i Grŵp Clwstwr Canol y Fro am roi'r cyfle i ni ehangu'r gwaith hwn. Mae'n golygu y gallwn gyrraedd mwy o bobl ifanc ag ystod ehangach o anghenion, a chreu mwy o gapasiti ar gyfer gwaith ystyrlon sy'n cefnogi eu hiechyd meddwl a'u lles.  

“Rydym hefyd yn ddiolchgar i Hurts So Good am gyflwyno gweithdai ysbrydoledig a helpodd ein pobl ifanc i greu darn gwych o waith celf ar gyfer y gofod newydd. Mae'n hyfryd gweld y gymuned eisoes yn dod at ei gilydd.” 

Bydd ehangu'r gofod yn cynyddu'r capasiti yn sylweddol ac yn galluogi sesiynau i gael eu cynnal ar yr un pryd, gan ganiatáu i fwy o bobl ifanc gael mynediad at y gefnogaeth sydd ei hangen arnynt yn y gymuned.  

Nid oes angen atgyfeiriad nac apwyntiad ymlaen llaw ar bobl ifanc sy'n chwilio am gymorth gan yr Hangout ond gallant alw heibio ar amser sy'n gyfleus iddyn nhw. I gael rhagor o wybodaeth am y gwasanaeth, ewch i https://platform.org/project/the-hangout/.