Gwell Cefnogaeth i Rieni a Gofalwyr i Ofalu am Blant Anhwylus Gartref

30 Rhagfyr 2022

Am y tro cyntaf yng Nghymru, mae Ystafell Hyfforddi Gwell yn y Cartref newydd wedi agor ym Mwrdd Iechyd Prifysgol Caerdydd a’r Fro, dan arweiniad Nyrs Hyfforddwr Rhieni WellChild, Laura Trustcott-Wright.

Mae Ystafelloedd Gwell yn y Cartref WellChild wedi'u cynllunio i helpu i roi cymorth i rieni a gofalwyr ynghylch sut i ddiwallu anghenion eu plant sy'n ddifrifol wael, mewn amgylchedd diogel, lle gallant hyfforddi dan oruchwyliaeth nyrsys a gweithwyr gofal iechyd proffesiynol. Wedi'u gosod fel ystafell wely plentyn, maent yn darparu gofod diogel i baratoi ar gyfer darparu gofal yn y cartref.

Nod hyfforddiant sgiliau clinigol ar gyfer rhieni a gofalwyr yw meithrin eu cymhwysedd a’u hyder i ofalu am eu plentyn mewn modd cefnogol, gan gefnogi proses o ryddhau yn gynnar o’r ysbyty ac atal aildderbyniadau i’r ysbyty. Mae’r hyfforddiant yn anelu at rymuso teuluoedd a gofalwyr di-dâl i ddarparu gofal diogel ac effeithiol sy'n seiliedig ar dystiolaeth i'w plentyn sydd ag anghenion meddygol cymhleth sy'n newid yn aml.

Mae WellChild yn ariannu’r prosiect ym Mwrdd Iechyd Prifysgol Caerdydd a’r Fro. Elusen genedlaethol yw WellChild sy’n cefnogi rhieni plant sy’n delio â salwch difrifol, ac maent yn cefnogi naw ystafell hyfforddi arall ar draws y DU. Sicrhawyd y cyllid ar gyfer swydd Laura drwy grant gan The October Club, gan ganiatáu iddi ddarparu cymorth yn y maes hwn sy'n cael effaith sylweddol ar blant a'u teuluoedd.

Dywed Laura mai camu i rôl Nyrs Hyfforddwr Rhieni yw ei 'swydd ddelfrydol', gan ymuno â Rhwydwaith WellChild o dros 50 o nyrsys. Mae Laura yn nyrs bediatrig ymroddedig a thosturiol a ddechreuodd ei gyrfa yn Ysbyty Great Ormond Street ar ôl graddio o Brifysgol Morgannwg. Yn ddiweddarach daeth yn Hwylusydd Ymarfer yn y Niwrowyddorau a pharhaodd â’i datblygiad proffesiynol trwy ymgymryd â Modiwlau Lefel Meistr ym Mhrifysgol South Bank Llundain, yn ogystal â chwblhau cyrsiau arbenigol mewn Mentoriaeth, Niwrowyddorau a Gofal Dibyniaeth Uchel. Enillodd ei Thystysgrif Ôl-raddedig mewn Addysg Ymarfer yn 2019, gan ddod yn Athro gyda'r NMC.

Dywedodd Laura: “'Fel Hyfforddwr Rhieni WellChild, gallaf gefnogi plant ag anghenion cymhleth a'u teuluoedd ar eu taith o'r ysbyty i'r cartref a pharhau â hyfforddiant sgiliau clinigol mewn lleoliadau cymunedol yn ardal ein Bwrdd Iechyd. Rwy’n cael fy ysbrydoli gan y teuluoedd rwy’n cwrdd â nhw bob dydd, ac er efallai mai fy rôl i yw addysgu, credaf fy mod i hefyd yn dysgu oddi wrthyn nhw yn barhaus. Rwy’n teimlo’n freintiedig i gael gweithio ochr yn ochr â phobl wirioneddol ysbrydoledig ac rwy’n ffodus bod y swydd hon wedi caniatáu i hyfforddiant gael ei ddarparu mewn ffordd sy’n canolbwyntio ar y teulu.”

Dywedodd rheolwr Laura, Alison Davies, Uwch Nyrs Gwasanaethau Plant, Pobl Ifanc ac Iechyd Teuluol: “O fewn Bwrdd Iechyd Prifysgol Caerdydd a’r Fro rydym yn hynod falch o’r gwaith y mae Laura wedi’i wneud fel Hyfforddwr Rhieni WellChild a’r effaith y mae hi wedi’i chael mewn cyfnod mor fyr. Mae gan Laura awch heintus am fywyd ac agwedd 'gallu gwneud' sy'n wirioneddol ysbrydoledig. Mae hi’n dangos arweinyddiaeth gref ac yn eirioli dros y plant a’r bobl ifanc yn ei gofal bob dydd.”