Dan Sylw - Charlotte King

30 Rhagfyr 2025

Y mis hwn rydym yn falch o roi sylw i Charlotte King, un o ddau Gydlynydd Rhyddhau yn Ysbyty Athrofaol Cymru. Mae rôl Charlotte yn ymwneud â rhagweld problemau a allai ohirio rhyddhau claf ac yna datrys y rhain cyn iddynt godi.

Ymunodd Charlotte â Bwrdd Iechyd Prifysgol Caerdydd a'r Fro yn 2021, gan ddechrau yn nhîm gweinyddu Gwasanaeth Cynhwysiant Iechyd Caerdydd a'r Fro (CAVHIS). Yna symudodd i Ward A2, fel Llywiwr Gofal Cleifion.

Ward Feddygol Arhosiad Byr yw A2, ac roedd llawer o'i gwaith yn ymwneud â pharatoi i ryddhau cleifion. Meddai Charlotte: “Roeddwn i wrth fy modd. Doeddwn i erioed wedi gwneud unrhyw beth tebyg o'r blaen, ac rydych chi'n cael eich taflu i mewn, ond roeddwn i’n dwli arno. Dysgais pa mor bwysig yw cynllunio cynnar wrth ryddhau rhywun a sut i nodi rhwystrau posibl. Pan ddaeth y rôl hon i fyny, meddyliais 'dyna'r rôl berffaith i mi.'”

Fel Cydlynydd Rhyddhau, mae Charlotte yn disgrifio ei rôl fel 'hyrwyddo llif cleifion o fewn yr ysbyty, gan roi’r claf wrth wraidd popeth'. Fel arfer, bydd hi'n edrych ar gleifion a dderbyniwyd y noson flaenorol yn yr Uned Achosion Brys ac yn nodi unrhyw broblemau a allai atal eu taith a'u rhyddhau o'r ysbyty yn y pen draw. Yna bydd hi'n dod o hyd i ffyrdd o helpu i ddatrys y problemau hynny.

“Os oes gan glaf unrhyw bryderon ynghylch diogelu, problemau gyda’u pecynnau gofal, neu hyd yn oed broblemau gydag eiddo, byddwn yn ceisio eu nodi a’u datrys. O'r adeg y cânt eu derbyn i'r ysbyty, mae gan bob claf daith, ac mae'n ymwneud â chwilio am y rhai a allai gael un anodd a cheisio ei llyfnhau cystal â phosibl drwy gydol eu harhosiad yn yr ysbyty. Mae llawer o'r hyn a wnawn wedi'i anelu at sicrhau trosglwyddiad llyfn o'r ysbyty i'r gymuned.”

Mae rhan fawr o amser Charlotte yn cynnwys siarad â chleifion a'u teuluoedd i ddarganfod pa gefnogaeth sydd ei hangen arnynt. “Felly, dwi’n gofyn iddyn nhw: 'Beth allwn ni ei wneud i'ch helpu chi?' Ydych chi'n gwybod beth sydd angen i chi ei wneud i fynd adref? Ac mae'n rhoi llais iddyn nhw oherwydd gall fod mor ddryslyd.”

Gall weithiau arwain at dasgau annisgwyl. “Yn ddiweddar, es i allan a chael y cloeon wedi’u newid yn nhŷ rhywun oherwydd eu bod nhw wedi colli eu hallweddi ac felly nid oedd hi’n bosibl i’w rhyddhau. Trefnais y saer cloeon, ac yna aethon ni allan i'r eiddo i drefnu popeth. Mae yna lawer o bethau rydyn ni'n eu gwneud i helpu a hyrwyddo’r broses o ryddhau claf, nad yw'n ymwneud yn gyfan gwbl â'r ysbyty.”

Mae Charlotte yn gweithio'n agos gyda rheolwyr wardiau ledled yr ysbyty ac yn siarad â llu o dimau cymunedol, fel y Tîm Adnoddau Cymunedol, yr awdurdod lleol, gweithwyr cymdeithasol, cartrefi gofal a swyddogion tai. Mae hi'n chwerthin wrth iddi gofio merch claf yn dweud wrthi 'Rydych chi'n ddiplomatig iawn'.

Mae'n rôl amlochrog, sydd hefyd yn ymwneud â darparu hyfforddiant rhyddhau i staff, mynychu rowndiau bwrdd, adrodd data i Lywodraeth Cymru, gwella prosesau a llwybrau ond mae’n un y mae Charlotte yn ffynnu ynddi.

“Dwi wrth fy modd â’r rôl,” meddai hi. “Dwi wrth fy modd â’r prysurdeb. Dwi’n ceisio delio ag un peth ar y tro. Dwi’n trefnu un peth cyn symud ymlaen i'r nesaf. Dw i'n hoffi'r ffaith eich bod chi'n rhan o bopeth a bod cymaint yn digwydd. Mae'n wirioneddol brysur, ond dw i'n hoffi bod yn brysur, felly mae'n berffaith i mi. Ac mae mor werth chweil.”

Un o'r mentrau y mae Charlotte wedi gweithio arni yw 'Lleihau Amser yn yr Ysbyty'. Mae'n annog cleifion i ofyn i'w tîm ward 'Pryd alla i fynd adref?'. I ddarllen mwy am y fenter hon cliciwch yma: Lleihau Amser yn yr Ysbyty - Bwrdd Iechyd Prifysgol Caerdydd a’r Fro.

Mae pobl yn ganolog i bopeth a wnawn. Mae’r rhai sy’n gweithio ym Mwrdd Iechyd Prifysgol Caerdydd a’r Fro yn gwneud gwahaniaeth i fywydau pobl bob dydd.

Bob mis, bydd yr ymgyrch Dan Sylw yn taflu goleuni ar y gwahanol bobl sy’n rhan o BIPCAF; o’r rhai sy’n cefnogi y tu ôl i’r llenni, i’r rhai y gwnaeth eu hangerdd eu harwain at weithio yn eu rôl.

Fel sefydliad gyda dros 17,000 o gydweithwyr, bydd yr ymgyrch yn tynnu sylw at yr amrywiaeth o rolau, timau ac unigolion ar draws y bwrdd iechyd. Gall gweithio yn y GIG newid bywydau, i gydweithwyr ac i’r cleifion y maent yn eu helpu.