Brechlynnau MenB i gael eu cynnig i bobl 17 a 18 oed yng Nghaerdydd a'r Fro

24 Mehefin 2026

Disgwylir i frechlynnau meningitis B gael eu cynnig i bobl 17 a 18 oed yng Nghaerdydd a Bro Morgannwg o fis Gorffennaf ymlaen.

Bydd Bwrdd Iechyd Prifysgol Caerdydd a'r Fro yn anfon llythyrau apwyntiad at bawb a anwyd rhwng 1 Medi, 2007, a 31 Awst, 2008. Mae hon yn rhaglen sydd wedi'i thargedu'n llym ac ni fydd y rhai a aned y tu hwnt i'r dyddiadau hyn yn gymwys ar hyn o bryd.

Bydd angen dau ddos o'r brechlyn MenB ar fyfyrwyr cymwys i amddiffyn eu hunain, gyda'r cyntaf yn cael ei gynnig o ddiwedd mis Gorffennaf a'r ail ddos bedair wythnos yn ddiweddarach.

Bydd y clinigau brechu wedi'u lleoli yn

Hyb Llesiant Maelfa, Llanedeyrn (CF23 9PN)
Ysbyty'r Barri (CF62 8YH)
a Chanolfan Iechyd Glan yr Afon (CF11 9SH).

Cyflwynwyd y rhaglen frechu mewn ymateb i frigiad o achosion diweddar o lid yr ymennydd tra bod adolygiad llawn o'r dystiolaeth gan y Cyd-bwyllgor ar Imiwneiddio a Brechu (JCVI) ar y gweill.

Gall bacteria meningococol grŵp B (MenB) achosi salwch difrifol sy'n peryglu bywyd, gan gynnwys llid yr ymennydd a septisemia, gyda'r ddau yn gallu arwain at sepsis. Mae bod o gwmpas llawer o bobl newydd mewn mannau byw a rennir, fel neuaddau prifysgol, yn cynyddu'r risg o ledaenu'r bacteria sy'n achosi clefyd meningococol.

Mae data ar glefyd meningococol ymledol dros y pum mlynedd diwethaf wedi dangos, ar ôl babandod, mai ymhlith pobl 18 i 19 oed y gwelir y nifer uchaf o achosion.

Dywedodd Claire Beynon, Cyfarwyddwr Gweithredol Iechyd y Cyhoedd ym Mwrdd Iechyd Prifysgol Caerdydd a'r Fro: “Gall clefyd meningococol ddatblygu'n gyflym iawn ac, er ei fod yn brin, gall arwain at ganlyniadau dinistriol i unigolion a theuluoedd. Brechu yw'r ffordd orau o amddiffyn eich hun rhag haint MenB.

“Rydym wir yn annog pawb sy'n gymwys i fanteisio ar y cynnig o frechiad a sicrhau eu bod yn derbyn y ddau ddos, yn enwedig y rhai sy'n paratoi i ddechrau prifysgol neu goleg, lle gall byw a chymdeithasu mewn cysylltiad agos ag eraill gynyddu'r risg o haint.”

Cynhelir rhaglen frechu MenB bellach ar gyfer pob myfyriwr israddedig newydd sy'n troi'n 25 oed ar ôl 31 Rhagfyr, 2026 a fydd yn mynychu'r brifysgol am y tro cyntaf yn hydref 2026. Bydd rhagor o fanylion am hyn i ddilyn.

Dylai'r rhai sydd ag unrhyw ymholiadau ffonio tîm brechu Caerdydd a'r Fro ar 02921 841234.