Symud

Mae symud yn cwmpasu pob math o weithgarwch sy'n rhan o fywyd bob dydd. Mae hyn yn cynnwys gweithgarwch corfforol, chwaraeon a chwarae, ond hefyd cerdded neu feicio ar gyfer teithiau byr, dringo’r grisiau, gwaith tŷ, neu symud mwy yn y gwaith, yr ysgol neu gartref.

Pam mae’n bwysig symud

Mae bod yn egnïol yn helpu mwy na dim ond ni fel unigolion. Pan fyddwn ni'n symud mwy:

Mae'n cadw ein cyrff yn iach. Mae symud yn helpu ein calon, ein cyhyrau a'n hesgyrn i aros yn gryf. Mae'n lleihau ein risg o salwch ac yn ein helpu i gael mwy o egni yn ein bywydau bob dydd.
Mae'n cynnal ein meddyliau ac yn dod â llawenydd inni. Gall bod yn egnïol godi ein hwyliau, lleihau straen, a'n helpu i feddwl yn gliriach.
Mae'n ein helpu i gysylltu ag eraill. Mae symud, boed yn gerdded gyda ffrind, chwarae yn y parc, neu ymuno â grŵp, yn dod â phobl at ei gilydd ac yn ein helpu i deimlo'n rhan o gymuned.
Mae'n rhoi mwy o annibyniaeth i ni. Mae symud yn rheolaidd yn ein helpu i aros yn symudol, yn hyderus ac yn ein galluogi i wneud y pethau rydyn ni eisiau eu gwneud nawr ac wrth i ni fynd yn hŷn.
Mae'n dda i'r lleoedd rydyn ni'n byw ynddynt. Os bydd mwy ohonom yn cerdded, yn mynd ar sgwter neu feic ar gyfer teithiau byrrach, bydd ein strydoedd yn lleoedd mwy diogel, glanach a mwy dymunol i bawb eu mwynhau.

Pam nad yw bob amser yn hawdd

Mae llawer ohonom yn wynebu rhwystrau sy'n ei gwneud yn anoddach symud. Mae sut mae ein cymdogaethau wedi'u cynllunio, sut rydym yn teithio, ble rydym yn treulio ein hamser, y cyfleoedd sydd ar gael i ni, a'r disgwyliadau a'r normau o amgylch bywyd bob dydd i gyd yn llunio pa mor hawdd neu anodd yw hi i fod yn egnïol.

Dyna pam mae angen i ni gael gwared ar y rhwystrau sy'n ei gwneud hi’n anodd symud, a'i gynnwys yn ein bywyd beunyddiol.

Gwneud symud yn rhan o fywyd bob dydd

Mae symud yn haws i'w gynnal pan mae'n rhan o’r hyn rydyn ni eisoes yn ei wneud. Gallwn wneud symud yn rhan o’n bywyd bob dydd drwy:

Eistedd yn llai gartref neu yn y gwaith a symud ychydig ac yn aml
Cerdded neu feicio ar gyfer teithiau byr, fel mynd i'r siopau, i’r gwaith neu'r ysgol
Defnyddio trafnidiaeth gyhoeddus lle bo modd, a cheisio dod oddi ar y bws un arhosfan yn gynharach

I gefnogi hyn, rydym yn ceisio gwneud symud yn rhan o’n diwrnod arferol drwy ei gwneud yn haws i bobl fanteisio ar gyfleoedd, dylunio lleoedd iachach, a defnyddio tystiolaeth i ddeall beth sydd ei angen ar ein cymunedau.

NEU

Er mwyn gwneud hyn yn haws, rydym yn ceisio helpu pobl i fanteisio ar gyfleoedd, dylunio lleoedd iachach, a deall beth sydd ei angen ar ein cymunedau.

Dod o hyd i weithgareddau a chyfleoedd yn ein hardal leol

Rydyn ni'n gwybod, hyd yn oed pan rydyn ni eisiau symud mwy, y gall fod yn anodd darganfod beth sydd ar gael yn lleol. Dyna pam rydym yn datblygu Canfyddwr Gweithgareddau ar gyfer Caerdydd a Bro Morgannwg. Bydd y Canfyddwr Gweithgareddau yn dwyn ynghyd wybodaeth am weithgareddau, clybiau, sesiynau, grwpiau a mannau lleol mewn un lle.

Bydd yn helpu pobl i:

Ganfod gweithgareddau sy’n agos at lle maen nhw’n byw neu'n gweithio
Dod o hyd i opsiynau sy'n cyd-fynd â'u diddordebau, eu galluoedd a'u lefelau hyder
Nodi cyfleoedd am ddim neu am gost isel
Dysgu am grwpiau cerdded, sesiynau cymunedol, chwaraeon, cyfleoedd chwarae a gweithgareddau anffurfiol

I sefydliadau a grwpiau cymunedol, bydd y Canfyddwr Gweithgareddau yn ei gwneud hi'n haws rhannu'r hyn maen nhw'n ei gynnig a chyrraedd pobl a allai elwa.

Dros amser, bydd hyn hefyd yn ein helpu i greu darlun cliriach o'r hyn sydd ar gael ar draws ein hardal, lle mae bylchau'n bodoli, a lle mae angen cymorth neu fuddsoddiad ychwanegol fwyaf.

Cynnwys symud o fewn polisi cynllunio (Cynlluniau Datblygu Lleol)

Ochr yn ochr â chefnogi pobl i ddod o hyd i gyfleoedd, rydym yn gweithio i sicrhau bod symud yn cael ei gynnwys yn y ffordd y mae lleoedd yn cael eu cynllunio a'u datblygu.

Yng Nghaerdydd a Bro Morgannwg, rydym yn ymgorffori symud o fewn Cynlluniau Datblygu Lleol a chanllawiau cynllunio cysylltiedig fel bod datblygiadau newydd yn:

Blaenoriaethu cerdded, mynd ar sgwter neu feic
Darparu mannau gwyrdd ac agored diogel, hygyrch
Cynnwys cyfleusterau ar gyfer chwarae, chwaraeon a gweithgarwch anffurfiol
Wedi'u cysylltu'n dda ag ysgolion, siopau, gwasanaethau a thrafnidiaeth gyhoeddus
Cefnogi pobl o bob oed a gallu i fod yn egnïol yn agos at gartref

Rydym hefyd yn helpu i gynnwys symud o fewn Canllawiau Cynllunio Atodol, fel bod dylunio iach ac actif yn cael ei ystyried yn gyson mewn penderfyniadau cynllunio.

Defnyddio tystiolaeth: yr archwiliad o gyfleusterau gweithgarwch corfforol a chwaraeon

Am y tro cyntaf, rydym wedi cwblhau archwiliad o gyfleusterau gweithgarwch corfforol a chwaraeon ar gyfer Caerdydd. Mae'r archwiliad yn dwyn ynghyd wybodaeth am gyfleusterau dan do ac awyr agored, parciau, meysydd chwarae, canolfannau hamdden a mannau cymunedol ledled y ddinas. Mae'n ein helpu i ddeall pa ddarpariaeth sy'n bodoli, ble mae bylchau, a ble gallai buddsoddiad yn y dyfodol gael yr effaith fwyaf.

Bydd y dystiolaeth hon yn cael ei defnyddio i:

Lywio polisi a chanllawiau cynllunio
Cefnogi penderfyniadau ynghylch cyfraniadau datblygwyr
Arwain buddsoddiad yn y dyfodol
Gwella mynediad teg at gyfleoedd i symud