Mae angen help arnaf

07/08/25

Ble alla i gael cyngor ar iechyd rhywiol neu ddulliau atal cenhedlu?

Mae cyngor ar iechyd rhywiol ac atal cenhedlu ar gael mewn amryw wasanaethau, er enghraifft, eich meddygfa a fferyllfa gymunedol.

Gall fferyllfeydd cymunedol ddarparu cynhyrchion dros y cownter fel condomau, profion beichiogrwydd, dulliau atal cenhedlu brys a dulliau atal cenhedlu pontio. Gall fferyllfeydd hefyd ddarparu gwasanaethau atal cenhedlu am ddim gan y GIG, gan gynnwys darparu dulliau atal cenhedlu brys a phontio.

Mae'r Adran Iechyd Rhywiol yn cynnig ystod o wasanaethau iechyd rhywiol a gellir cysylltu â nhw ar 02921 835 208. Cyn ffonio, ewch i'r dudalen we i ddarganfod y ffordd orau o gael gafael ar y gwasanaeth sydd ei angen arnoch: Iechyd Rhywiol - Bwrdd Iechyd Prifysgol Caerdydd a'r Fro.

07/08/25

Sut alla i gael gafael ar Broffylacsis Ôl-gysylltiad (PEP) a Phroffylacsis Cyn-gysylltiad (PrEP)?

Os ydych chi'n poeni eich bod chi wedi dod i gysylltiad â HIV trwy ryw yn ystod y 72 awr ddiwethaf, ac angen PEP, gallwch gysylltu â'r Adran Iechyd Rhywiol ar 02921 835 208 o ddydd Llun i ddydd Gwener rhwng 9am a 3pm. Y tu allan i'r oriau hyn, gallwch ymweld â'r Uned Achosion Brys.

Os hoffech chi ddechrau PrEP, ffoniwch yr Adran Iechyd Rhywiol ar 02921 835 208 yn ystod oriau agor. Cynigir ymgynghoriad dros y ffôn wedi’i drefnu ar eich cyfer ar nos Fawrth.

Os ydych eisoes wedi cael presgripsiwn PrEP, gallwch ofyn am bresgripsiwn rheolaidd drwy'r ffurflen ar-lein. Gwnewch hyn pan fyddwch chi'n agor eich potel olaf (cyflenwad 1 mis).