Brechiad Gwanwyn COVID-19

27 Mawrth 2025

Mae pobl hŷn, preswylwyr cartrefi gofal a’r rhai sy’n imiwnoataliedig yn cael eu hannog i gael eu brechu yn erbyn COVID-19 y gwanwyn hwn.

Lansiodd Bwrdd Iechyd Prifysgol Caerdydd a’r Fro ei ymgyrch dos atgyfnerthu’r gwanwyn COVID-19 ar 1 Ebrill, 2025, a fydd yn rhedeg am dri mis tan 30 Mehefin, 2025.

Bydd pawb sy'n gymwys i gael y brechlyn am ddim yn cael eu gwahodd i fynychu Canolfan Frechu Gymunedol (CVC) ger eu cartref. Ar gyfer yr ymgyrch hon, mae mwy o CVCs wedi'u creu yng Nghaerdydd a Bro Morgannwg i sicrhau ei bod yn haws ac yn fwy cyfleus gael gafael ar y brechlyn.

Mae’r Cydbwyllgor Brechu ac Imiwneiddio (JCVI) wedi cynghori y dylid cynnig brechiad COVID-19 i:

• oedolion sy’n 75 mlwydd oed ac yn hŷn
• preswylwyr mewn cartref gofal i oedolion hŷn
• unigolion 6 mis oed a throsodd sy’n imiwnoataliedig (fel y’i diffinnir yn nhablau 3 neu 4 ym mhennod COVID-19 y Llyfr Gwyrdd)

Dywedodd Dino Motti, Meddyg Ymgynghorol mewn Meddygaeth Iechyd y Cyhoedd: “Cael eich brechu yw un o’r pethau pwysicaf y gallwch chi ei wneud i amddiffyn eich hun rhag COVID-19 ac i osgoi ei drosglwyddo i’n hanwyliaid.

“Hyd yn oed pe baech wedi cael y brechlyn y gaeaf hwn, gall mathau newydd o’r feirws gylchredeg yn ein cymunedau, ac mae amddiffyniad yn lleihau dros amser, felly mae’n hanfodol cael y brechiadau diweddaraf pan fyddant yn cael eu cynnig i chi.”

Ganwyd Jennifer Collins â’r anhwylder gwaed prin Neutropenia, sy’n atal ei mêr esgyrn rhag cynhyrchu digon o gelloedd gwaed gwyn. O ganlyniad, mae ganddi system imiwnedd wan ac mae hi’n ei chael yn anodd brwydro yn erbyn heintiau.

Mae hi wedi annog unrhyw un sy’n imiwnoataliedig i gael eu dos atgyfnerthu’r gwanwyn COVID-19. “Pan fyddaf yn derbyn neges destun neu lythyr yn fy ngwahodd i gael fy mrechiad COVID-19 nesaf, rwy’n gwybod pa mor bwysig yw mynychu oherwydd gallai fy lefelau amddiffyniad fod wedi gostwng dros amser ers fy un diwethaf,” esboniodd.

“Rwy’n mynychu bob tro gan wybod y bydd yn helpu i fy amddiffyn am gyfnod hirach, ac yn helpu i leihau’r risg y bydd angen i mi fynd i’r ysbyty oherwydd haint COVID-19 posibl.

“Byddwn yn annog unrhyw un sy’n imiwnoataliedig i gael eu brechiad pan gaiff ei gynnig, gan mai dyma’r amddiffyniad gorau yn erbyn unrhyw salwch difrifol o COVID-19. Bob tro rwy’n mynychu, mae’r holl beth drosodd o fewn munudau, nid yw’n cymryd braidd dim amser i helpu i roi’r cyfle gorau i mi fy hun i gadw’n iach.”

Gall unrhyw un sy'n gymwys ar gyfer pigiad atgyfnerthu’r gwanwyn COVID-19, ond sydd wedi optio allan o'r blaen, optio i mewn eto drwy ffonio ein canolfan alwadau ar 02921 841234 (ar agor 9am-5pm, o ddydd Llun i ddydd Gwener).

Mae rhagor o wybodaeth am frechlynnau’r ffliw a COVID-19 ar gael ar wefan Iechyd Cyhoeddus Cymru.

Catch-up clinics