Bwyta'n Iach

Mae misoedd yr haf yn llawn temtasiynau blasus, ond mae'n bwysig ceisio cynnal deiet iach a chytbwys sy'n cynnwys bwyta digon o ffrwythau a llysiau.

Mae bwyta pum dogn o ffrwythau a llysiau'r dydd yn ffordd syml ac effeithiol o gael maetholion gwerthfawr i'n cyrff, sydd â nifer o fanteision gan gynnwys:

• lleihau’r risg o glefyd y galon, strôc, rhai mathau o ganser a diabetes,
• ffynhonnell wych o fitaminau, mwynau a ffeibr,
• bydd gennych fwy o egni trwy gydol y dydd,
• mae'n cyfrannu at gael system imiwnedd gref i helpu i frwydro yn erbyn afiechyd.

Gall fod yn anodd meddwl am ffyrdd newydd a diddorol o ychwanegu maetholion at ein bwyd, yn enwedig os oes gennych blant nad ydynt efallai'n mwynhau blas opsiynau iachach. Gall yr awgrymiadau a'r triciau canlynol eich helpu i fwynhau cael mwy o ffrwythau a llysiau yn eich diet.

Mae ryseitiau ffrwythau a llysiau cudd yn ffordd wych o gynnwys maetholion gwerthfawr mewn prydau a byrbrydau bob dydd os oes gennych chi blentyn sy'n gadael ei lysiau ar ei blât yn rheolaidd.

O ryseitiau un pot i sawsiau syml, mae amrywiaeth o opsiynau hawdd ar gyfer sicrhau bod eich teulu cyfan yn cael eu pump y dydd. Gall cyri cyw iâr syml guddio pedwar o lysiau maethlon drwy gymysgu moron, corbwmpen, blodfresych a phupur coch at eich hoff saws cyri.

Edrychwch ar ryseitiau llysiau cudd ar wefan BBC Good Food i gael mwy o ysbrydoliaeth.

Mae yna lawer o ffyrdd hawdd y gallwch chi newid eich hoff fyrbryd haf am opsiwn iachach sydd yr un mor flasus. Ceisiwch rewi ffrwythau fel dewis arall yn lle loli iâ neu ddefnyddio iogwrt naturiol i wneud hufen iâ cartref, iachach.

Mae tîm Maeth a Deieteg Caerdydd a’r Fro wedi llunio rhestr o ryseitiau blasus i’ch helpu i gynnal deiet cytbwys wrth fwyta’r bwydydd rydych chi’n eu mwynhau.