Tri phrosiect BIP Caerdydd a'r Fro yn ennill yng Ngwobrau Cynaliadwyedd y GIG 2024
14 Mehefin 2024
Mae Bwrdd Iechyd Prifysgol Caerdydd a’r Fro yn falch iawn o gyhoeddi bod tair o’i fentrau amgylcheddol gynaliadwy wedi ennill yng Ngwobrau Cynaliadwyedd GIG Cymru.
Mae Gwobrau Cynaladwyedd GIG Cymru yn dathlu ffyrdd o wneud gwasanaethau gofal iechyd yn fwy amgylcheddol gynaliadwy. Cyhoeddwyd y derbynwyr mewn seremoni yng Ngwesty’r Vale ddydd Iau 13 Mehefin.
Dyfarnwyd y Wobr 'Lledaeniad a Graddfa' i Gynllun Ailgylchu Cymhorthion Cerdded Caerdydd a'r Fro.
Sylwodd tîm Ffisiotherapi BIPCAF fod nifer sylweddol o gymhorthion cerdded yn cael eu hanfon i safleoedd tirlenwi gan nad oedd proses i'w hailgylchu a'u hailddefnyddio.
Ymunodd y tîm â Gwasanaeth Prawf EM Caerdydd i sicrhau bod y gweithlu yn gwirio diogelwch ac yn glanhau cymhorthion cerdded a ddychwelwyd. Trwy’r Amnest Cymhorthion Cerdded a phroses ddychwelyd gliriach, mae 8,000 o faglau, fframiau a ffyn cerdded wedi’u hadnewyddu a’u hailgylchu dros y ddwy flynedd ddiwethaf.
Enillodd KidzMedz Cymru Wobr Cymru Ffyniannus am eu gwaith yn addysgu plant dros bump oed i newid o feddyginiaeth hylif i solet. Mae meddyginiaethau hylif yn costio mwy, mae ganddynt oes silff fyrrach, maent yn arwain at fwy o wastraff ac mae ganddynt ôl troed carbon uwch oherwydd mwy o becynnu.
Creodd y tîm becynnau cymorth addysgol gan gynnwys capsiwlau ffug a thystysgrifau. Mae'r prosiect wedi lleihau nifer y meddyginiaethau hylif a ddosberthir.
Dyfarnwyd Gwobr Cymru sy'n Gyfrifol yn Fyd-eang i Uned Gofal Critigol Oedolion BIPCAF. Mae'r Tîm ICU Gwyrdd wedi gwneud llu o newidiadau gyda'r nod o roi cynaliadwyedd amgylcheddol wrth wraidd y ffordd y maent yn gofalu am gleifion, staff a'r blaned.
Mae'r tîm wedi llwyddo i leihau eu defnydd o drydan, wedi cyflwyno dull ailgylchu poteli bwydo enterig ac wedi lleihau nifer y cleifion sy’n yfed dŵr potel di-haint ymhlith llawer o fentrau eraill.
Cyrhaeddodd dau ar bymtheg o brosiectau eraill o Fwrdd Iechyd Prifysgol Caerdydd a’r Fro restr fer Gwobrau Cynaliadwyedd GIG Cymru.
Dywedodd Calum Shaw, Rheolwr Prosiect Cynaliadwyedd Amgylcheddol BIPCAF: “Mae’r prosiectau arobryn hyn yn dangos rhywfaint o’r gwaith anhygoel sy’n cael ei wneud ar draws y Bwrdd Iechyd i sicrhau canlyniadau ecogyfeillgar ac i weithredu ar gyfer y dyfodol.
“Mae gwybodaeth a phrofiad helaeth o fewn ein holl brosiectau enwebedig, a gobeithio y gallant gefnogi ac ysbrydoli newid cynaliadwy pellach yn ein lleoliadau gofal iechyd.”
Darllenwch fwy am ymrwymiad y Bwrdd Iechyd i weithredu ar gyfer y dyfodol yn shapingourfuturewellbeing.com a'r cynllun i leihau ei effaith ar y blaned.