Tri phrosiect BIP Caerdydd a'r Fro yn ennill Gwobrau GIG Cymru 2025

20 Tachwedd 2025

Mae Bwrdd Iechyd Prifysgol Caerdydd a'r Fro yn dathlu ar ôl ennill tair gwobr yng Ngwobrau GIG Cymru 2025. Cyhoeddwyd y gwobrau mewn seremoni ddydd Mawrth, 18  Tachwedd 2025.

Mae Gwobrau GIG Cymru yn dathlu rhagoriaeth mewn ansawdd a gwelliant ar draws iechyd a gofal yng Nghymru.

Cyrhaeddodd BIP Caerdydd a'r Fro y rhestr fer mewn wyth categori a derbyniodd y gwobrau canlynol:

Gwobr Gofal Effeithiol GIG Cymru 2025

Llongyfarchiadau i'r Tîm Gofal Lliniarol! Gan weithio ar y cyd â chydweithwyr ledled BIP Caerdydd a'r Fro ac mewn partneriaeth ag Ymddiriedolaeth GIG Prifysgol Felindre, mae'r tîm wedi derbyn Gwobr Gofal Effeithiol GIG Cymru 2025 am gyflwyno offer diagnostig cartref arloesol sy'n gwella gofal lliniarol a gofal diwedd oes o fewn y gymuned.

Canolbwyntiodd y prosiect hwn ar ddarparu gofal sy'n seiliedig ar werth, sy'n canolbwyntio ar yr unigolyn, i gleifion â chyflyrau sy'n cyfyngu ar fywyd, yn enwedig clefyd interstitaidd yr ysgyfaint (ILD), drwy gyflwyno profion pwynt gofal (POCT) mewn lleoliadau gofal lliniarol cymunedol. Nod y prosiect hwn oedd lleihau derbyniadau diangen i'r ysbyty a sicrhau bod gofal yn cyd-fynd â dewisiadau cleifion i aros gartref yn ystod diwedd oes.

Gwobr Gwybodaeth GIG Cymru 2025

Derbyniodd tîm Nyrsio Digidol BIP Caerdydd a'r Fro, sy'n rhan o'r tîm Nyrsio Corfforaethol, Wobr Gwybodaeth GIG Cymru 2025 am sicrhau cynnydd o 50% yn y defnydd ystyrlon o ddata nyrsio o fewn blwyddyn, gan wneud penderfyniadau clinigol sy'n seiliedig ar dystiolaeth yn hyderus.

Dechreuodd gwaith y tîm Nyrsio Digidol gyda dealltwriaeth gyffredin bod mynediad at ddata staffio amserol, dibynadwy yn gyfyngedig. Cyn hyn, roedd data yn ddarniog, yn cael ei danddefnyddio, a'i ddatgysylltu oddi wrth ymarfer dyddiol, gan adael nyrsys heb fewnwelediad amserol i reoli risgiau, staffio, a gofal cleifion yn effeithiol.

Er mwyn pontio'r bwlch hwn, cyd-gynlluniodd y tîm gyfres o ddangosfyrddau rhyngweithiol gan ddefnyddio Microsoft Power BI. Gan weithio'n agos gyda thimau nyrsio mewn gweithdai, gwnaethant gyflwyno'r offer a'u mireinio'n barhaus yn seiliedig ar adborth i sicrhau eu bod yn bodloni anghenion nyrsio yn y byd go iawn.

Mae'r tîm Nyrsio Digidol yn dwyn ynghyd gyfuniad hanfodol o arbenigedd clinigol a dadansoddol, gyda'r nyrsys Emma Davies, Aron White a Helen Bonello yn gweithio ochr yn ochr â'r dadansoddwr sefydledig Ceri Dallimore. Roedd y profiad cyfunol hwn yn golygu eu bod yn gallu datblygu offer yn gyflym a oedd yn ymarferol, yn berthnasol ac wedi'u siapio gan brofiad nyrsio go iawn.

Dysgwch fwy am y gwaith yn y tîm Nyrsio Digidol yma

Gwobr Cynaliadwyedd Gweithlu GIG Cymru 2025

Gwnaeth y Tîm Nyrsio Corfforaethol hefyd dderbyn Gwobr Cynaliadwyedd Gweithlu GIG Cymru 2025 am arwain rhaglen wella sy'n cael ei hyrwyddo gan nyrsys, a’i harwain gan ddata sy'n mynd i'r afael â risgiau diogelwch yn sgil staffio anghyson ac yn lleihau dibyniaeth ar staff dros dro.

Mae Gwobrau GIG Cymru yn arddangos enghreifftiau o waith gwella ansawdd a diogelwch anhygoel sy’n trawsnewid y profiad a’r canlyniadau i bobl yng Nghymru.

Llongyfarchiadau i bawb o'r enillwyr ac i bob un o brosiectau eithriadol BIP Caerdydd a'r Fro a gyrhaeddodd y rhestr fer.

Gallwch weld rhestr lawn enillwyr Gwobrau GIG Cymru 2025 yn nhsawards.wales