Diweddariad gweithredol ar Norofeirws ar draws ein safleoedd ysbyty

11 Mawrth 2026

Oherwydd effaith barhaus yr achosion o Norofeirws ar draws sawl un o'n safleoedd ysbyty, mae ein gwasanaethau dan bwysau sylweddol ar hyn o bryd. Pan fydd Norofeirws yn lledaenu o fewn ysbytai, gall arwain at gau wardiau a lleihau argaeledd gwelyau, gan effeithio ar ein gallu i ofalu am gleifion sydd angen triniaeth.

Er mwyn helpu i leihau lledaeniad yr haint, gofynnwn i gleifion ac ymwelwyr fynychu safleoedd ein hysbytai dim ond os ydych chi'n teimlo'n heini ac yn iach. Ni ddylai unrhyw un sy'n profi symptomau cyfog, chwydu a/neu ddolur rhydd fynychu ein safleoedd nes eu bod wedi bod yn glir o symptomau am o leiaf 48 awr. Os oes gennych apwyntiad claf allanol ac yn dechrau teimlo'n sâl, cysylltwch â'r adran cyn mynychu fel y gellir ystyried trefniadau eraill.

Gellir rheoli'r rhan fwyaf o achosion o Norofeirws gartref drwy orffwys, yfed hylifau a hunanofal ac mae'r symptomau fel arfer yn gwella o fewn 2 i 3 diwrnod. Os ydych chi'n ansicr ynglŷn â'ch symptomau, gallwch ddefnyddio gwiriwr symptomau ar-lein GIG 111 Cymru i gael cyngor ac arweiniad. Os oes angen cyngor gofal iechyd brys arnoch neu fynediad at wasanaethau y tu allan i oriau gwaith, ffoniwch 111 i siarad â chlinigwr. Dim ond ar gyfer argyfyngau difrifol neu sy'n peryglu bywyd y dylid defnyddio ein Huned Achosion Brys.

Mae ein cydweithwyr yn dilyn canllawiau llym ar atal a rheoli heintiau, gan gynnwys golchi dwylo'n drylwyr, i helpu i leihau lledaeniad haint yn ein hysbytai. Cefnogir y mesurau hyn gan ganllawiau cenedlaethol, gan gynnwys y Llawlyfr Atal a Rheoli Heintiau Cenedlaethol gan Iechyd Cyhoeddus Cymru, a'n polisi cod gwisg lleol. Cynghorir staff sy'n datblygu symptomau heintiau anadlol neu feirysol i beidio â mynychu'r gwaith nes eu bod wedi bod yn glir o symptomau am o leiaf 48 awr.

Diolch am eich cefnogaeth a'ch cydweithrediad parhaus wrth helpu i amddiffyn ein cleifion, staff a'r cymunedau rydyn ni'n eu gwasanaethu.

Jason Roberts | Cyfarwyddwr Gweithredol Nyrsio