Tîm Gofal Lliniarol

Croeso i'r Gwasanaethau Gofal Lliniarol Arbenigol 

Mae Gofal Lliniarol ar gael i gleifion nad yw eu clefyd neu salwch yn ymateb rhagor i driniaeth iachaol. Gall hyn gynnwys y rheini y mae canser neu afiechyd heblaw canser wedi effeithio arnynt, er enghraifft camau terfynol clefyd yr ysgyfaint, clefyd y galon, clefyd niwronau motor, a sglerosis ymledol.

Mae'r tîm gofal lliniarol ysbyty yn Ysbytai Athrofaol Cymru a Llandochau, sy'n ymdrin ag ysbytai ategol y Barri, Dewi Sant, Ysbyty Brenhinol Caerdydd a Rookwood, yn darparu gwasanaeth i gleifion a'u teuluoedd. Drwy wasanaeth aml-broffesiwn, integredig, ein nod yw ymateb yn effeithiol, gan gynnig cyngor a chymorth arbenigol yn yr ysbyty. Drwy gydweithio byddwn yn cefnogi, addysgu, annog a grymuso aelodau eraill o staff i ddarparu gofal effeithiol.

Mae'r tîm yn darparu cysylltiadau â'r timau Gofal Lliniarol Cymunedol a hosbisau lleol, gan sicrhau gofal a chymorth di-dor rhwng yr ysbyty a'r gymuned.  

Yr hyn a ddarparwn 

• Rheoli Symptomau
• Cymorth a chwnsela i gleifion a'u teuluoedd
• Gwybodaeth
• Cyswllt rhwng y tîm amlddisgyblaethol i helpu i ryddhau cleifion gartref neu eu trosglwyddo i unedau arbenigol 
• Cymorth addysgol

Lleoliadau

Gofal Lliniarol Arbenigol Cymunedol

Darperir Gofal Lliniarol Arbenigol Cymunedol yn lleol gan ddau wahanol ddarparwr sy'n cyflenwi gwasanaethau tebyg i gleifion a'u teuluoedd yn eu cartrefi eu hunain - mewn Cartrefi Gofal neu mewn canolfan Gofal Lliniarol Arbenigol, fel yr Hosbis Marie Curie.

Bydd y tîm Gofal Lliniarol Ysbyty yn hwyluso atgyfeirio i un o'r sefydliadau hyn (isod) pan fydd cleifion am gael eu rhyddhau o'r ysbyty. Gwneir hyn mewn ymgynghoriad â meddyg teulu a Nyrs Ardal y claf.