Cwrdd â’r tîm o Uwch Ymarferwyr Nyrsio Llawfeddygol Pediatrig (ANPs)
Rebecca Seymour: RGN, RSCN, BSc, MSc
Erica Thomas: RGN, RSCN, BSc, MSc.
Emma White: RGN, RSCN, BSc, MSc
Beth ydyn ni’n ei wneud?
Mae ANPs llawfeddygol yn nyrsys clinigol hynod brofiadol sydd wedi astudio nyrsio yn y brifysgol ac yna wedi mynd ymlaen i gwblhau Gradd Meistr. Rydym yn gweithio ar y cyd â’r llawfeddygon er budd plant sy’n derbyn gofal gan yr adran Llawfeddygaeth Bediatrig ac Wroleg yn Ysbyty Arch Noa i Blant Cymru yng Nghaerdydd.
Fel ANPs gallwn asesu, diagnosio, trin, a delio â phlant sy'n cyflwyno gydag amheuaeth o salwch llawfeddygol sy'n mynychu'r ysbyty trwy'r CEAU (Uned Asesu) neu'r Adran Achosion Brys. Gallwn wneud llawer o'r hyn y mae'r llawfeddygon yn ei wneud, ond nid y llawdriniaeth yn y theatrau llawdriniaeth.
Gall ANPs llawfeddygol gynnig cymorth ac adnoddau i gleifion a'u teuluoedd reoli eu gofal iechyd a, phan fo angen, eu hatgyfeirio at dimau arbenigol eraill. Mae rhai enghreifftiau yn cynnwys teuluoedd sydd â phryderon am gastrostomïau, meddyginiaeth, cathetrau, gofal clwyfau, neu linellau Hickman wedi'u difrodi. Mae unrhyw adolygiadau a newidiadau i gynlluniau triniaeth yn cael eu cyfleu yn ôl i Feddyg Ymgynghorol y plentyn ei hun er mwyn sicrhau gofal diogel a pharhaus.
Mae’r tîm ANP yn arwain dau glinig yn adran cleifion allanol Seren Fôr; un ar gyfer ffimosis cynhenid (blaengroen na ellir ei dynnu'n ôl), ac un ar gyfer rheoli'r coluddyn sy'n ymwneud â phlant a anwyd â chyflyrau GI isaf cynhenid (Clefyd Hirschsprung a Chamffurfiadau Anorefrol).
Mae ein tîm yn ymwneud â rhaglenni addysgu ar gyfer gweithwyr gofal iechyd proffesiynol eraill ar wardiau ysbyty, yn y gymuned, ac yn yr ystafell ddosbarth. Rydym wedi datblygu sawl taflen Addysg Rhieni i roi cymorth ychwanegol i gleifion a theuluoedd.
Mae’r rôl addysgol hon yn ein galluogi i gefnogi datblygiad proffesiynol nyrsys eraill ym maes llawfeddygaeth bediatrig, ac er budd ein cleifion a’r gymuned ehangach.
Yn ogystal â chefnogi plant a'u teuluoedd yn yr ysbyty, rydym hefyd ar gael i weithwyr gofal iechyd proffesiynol eraill o'r tu allan i'r Ysbyty Plant gysylltu â ni. Fel hyn gallwn gynnig gwybodaeth a chyngor i helpu gyda gofal parhaus ein cleifion.