Cyd-weithwyr BIP Caerdydd a'r Fro yn cael eu cydnabod ar Restr Anrhydeddau Blwyddyn Newydd y Brenin

Mae Bwrdd Iechyd Prifysgol Caerdydd a'r Fro yn falch o gyhoeddi bod pedwar o'i gydweithwyr wedi derbyn cydnabyddiaeth am eu gwaith ym maes gofal iechyd ar Restr Anrhydeddau  Blwyddyn Newydd y Brenin ar gyfer 2025.

Mae'r Athro Zaheer Raza Yousef, Cardiolegydd Ymgynghorol yn Ysbyty Athrofaol Cymru, wedi derbyn Urdd yr Ymerodraeth Brydeinig (OBE) am ei wasanaethau i drin methiant y galon.

"Mae’n fraint o’r mwyaf i fod wedi derbyn yr anrhydedd hon," meddai'r Athro Yousef. "Rwy'n ddiolchgar i'r holl gleifion sydd wedi ymddiried ynof i ddarparu gofal iechyd iddynt, ac i'm teulu, ffrindiau a chydweithwyr sydd wedi fy helpu i ymchwilio a datblygu triniaethau a gwasanaethau methiant y galon yng Nghymru a thu hwnt. Mae Prifysgol Caerdydd wedi cefnogi ein prosiect Methiant y Galon Affrica ac edrychaf ymlaen at adeiladu ar y cyflawniadau hyn wrth i driniaethau newydd ddod i'r amlwg i gleifion â methiant y galon."

Mae'r Athro Florence Susan Thim Peck Wong, Athro Diabetes a Metabolaeth ym Mhrifysgol Caerdydd a Meddyg Ymgynghorol Anrhydeddus mewn Diabetes yn Ysbyty Athrofaol Cymru, wedi ennill Cadlywydd yr Ymerodraeth Brydeinig (CBE) am ei gwasanaethau rhagorol i ddiabetes a metabolaeth.

"Rwyf wrth fy modd ac yn teimlo'n freintiedig iawn i dderbyn y wobr hon," meddai'r Athro Wong. "Mae'n fraint cael gweithio gyda llawer o gydweithwyr proffesiynol, cydweithwyr gwyddonol, aelodau o sefydliadau elusennol diabetes a phobl sy'n byw gyda diabetes. 

"Rwy'n rhannu'r anrhydedd hon gyda phob un ohonynt. Fel ymchwilydd, clinigydd ac addysgwr, edrychaf ymlaen at gyfrannu at ddatblygiadau parhaus mewn gwyddoniaeth a gofal i bobl sy'n byw gyda diabetes."

Mae Dr Richard Arnold Charles Lea, Meddyg Ymgynghorol mewn Meddygaeth Acíwt a Chyfarwyddwr Clinigol ym Mwrdd Iechyd Prifysgol Caerdydd a'r Fro, wedi cael ei anrhydeddu gydag Aelod o Urdd yr Ymerodraeth Brydeinig (MBE) am ei wasanaethau i feddygaeth acíwt.

Meddai Dr Lea, "Diolch am yr anrhydedd anhygoel hwn yr wyf yn falch o'i derbyn ar ran ein tîm anhygoel, y mae eu gwaith caled, proffesiynoldeb ac ymroddiad i'n cleifion wedi arwain at y wobr hon.

"Mae taith Meddygaeth Acíwt yng Nghaerdydd a'r Fro wedi bod yn anhygoel ac yn dangos y gwahaniaeth enfawr y gallwn ei wneud i'n cleifion pan fyddwn i gyd yn gweithio gyda'n gilydd."

Mae Wendy Ansell, Bydwraig Arbenigol, hefyd yn derbyn MBE am ei gwasanaethau i oroeswyr arferion niweidiol ac i fenywod sy'n chwilio am noddfa.

"Rwy'n mwynhau fy swydd yn fawr iawn ac yn teimlo'n freintiedig iawn i gefnogi rhai o'n cleifion mwyaf agored i niwed wrth iddynt symud ymlaen ar eu taith i fod yn rhieni," meddai Wendy.

"Nid dim ond i mi y mae'r wobr hon, mae hon ar gyfer yr holl dimau sy'n gweithio i gefnogi ein cleifion, a hefyd yn rhoi llwyfan i'r menywod hynny sy'n chwilio am noddfa i'n galluogi i wella safonau gofal o ansawdd yn barhaus, gwella canlyniadau a chreu gwasanaethau mwy hygyrch i'n cleifion."

Dywedodd Suzanne Rankin, Prif Weithredwr, a Charles ‘Jan’ Janczewski, Cadeirydd Bwrdd Iechyd Prifysgol Caerdydd a’r Fro: "Rydym yn hynod falch o'n cydweithwyr am eu gwaith ymroddedig yn cefnogi pobl ledled Caerdydd a Bro Morgannwg a Chymru. Mae hyn yn destament haeddiannol i’w cyfraniadau i’r GIG.

"Ar ran y Bwrdd Iechyd, estynnwn ein llongyfarchiadau i'r Athro Wong, yr Athro Yousef, Wendy Ansell a Dr Lea."