Wythnos Gwirfoddolwyr 2025: Dathlu gwirfoddolwyr ein bwrdd iechyd

Mae gan Fwrdd Iechyd Prifysgol Caerdydd a'r Fro tua 600 o wirfoddolwyr ymroddedig sy'n cefnogi cleifion mewn amrywiol ffyrdd, o ddydd i ddydd. 

Mae’n Wythnos y Gwirfoddolwyr yr wythnos hon, cyfle i ddiolch i wirfoddolwyr am eu gwaith caled a chydnabod yr effaith sydd ganddyn nhw ar ofal cleifion. Mae hefyd yn gyfle i hyrwyddo'r ystod o gyfleoedd gwirfoddoli sydd ar gael, a'r manteision y gall gwirfoddoli eu cynnig. 

Mae amrywiaeth o gyfleoedd gwirfoddoli gwahanol ar gael yn y bwrdd iechyd, o groesawu cleifion wrth iddynt gyrraedd yr ysbyty a sgwrsio â chleifion yn ystod eu harhosiad, i hwyluso sesiynau celf a chrefft neu gerddoriaeth.  

Mae gwirfoddolwyr yn rhoi o'u hamser, boed yn 1 awr neu'n 10 awr yr wythnos, i fod yno i gleifion a gwella eu profiad cyffredinol yn yr ysbyty. 

Mae'r bwrdd iechyd yn gweithio gyda sefydliadau partner ac elusennau fel Sgiliau a Gwirfoddoli Cymru, Marie Curie, Gardd Horatio, Prifysgol De Cymru a Phrifysgol Caerdydd i gynnig amrywiaeth o rolau gwirfoddoli i bobl o bob oed. 

Mae cyfeillion cleifion ymhlith y rolau gwirfoddoli mwyaf poblogaidd ledled y bwrdd iechyd. Mae'r gwirfoddolwyr hyn yn rhyngweithio â chleifion a allai deimlo'n unig, ynysig neu'n ddiflas pan fyddant ar y wardiau. Maen nhw'n treulio amser yn siarad â chleifion,  eu cefnogi gyda gweithgareddau wrth ochr y gwely neu yn yr ystafelloedd dydd. Gall y gwirfoddolwyr hyn wneud gwahaniaeth gwirioneddol i ddiwrnod claf, yn enwedig i'r rhai nad ydynt yn derbyn llawer o ymwelwyr.