"Tu ôl i bob claf mae stori. A'm gwaith i yw gwella fy nghlaf" | Gwyliwch bennod pedwar o Saving Lives in Cardiff

28 Ebrill 2025

Darlledir pennod pedwar o Saving Lives in Cardiff nos Lun yma am 9pm ar BBC One Wales a ddydd Mercher am 9pm ar BBC Two. Mae’n cynnig cipolwg ar waith medrus iawn y timau llawfeddygol ym Mwrdd Iechyd Prifysgol Caerdydd a’r Fro a’r cleifion y mae eu bywydau’n dibynnu arnynt.

Mae'r bennod yn agor gyda'r Llawfeddyg Fasgwlaidd Ymgynghorol Mr Lewis Meecham yn wynebu gorfod canslo dwy lawdriniaeth gynlluniedig. “Os caiff eich llawdriniaeth ei chanslo,” meddai Lewis, “nid yw hyn oherwydd ein bod ni eisiau ei chanslo. Mae'n llythrennol oherwydd nad oes gwelyau, ac mae yna argyfyngau."

Yn benderfynol o wneud y gorau o amser y theatr, mae ef a’i gyd-lawfeddyg Huw Davies yn cynnal llawdriniaeth ar goes Maureen, 86 oed. Mae Maureen wedi cael ei derbyn oherwydd madredd yn ei throed, a achoswyd gan rydwelïau afiach yn ei choes.

Heb y llawdriniaeth mae Maureen mewn perygl o golli ei choes ac o bosibl ei bywyd. Mae’n optimistaidd iawn cyn y llawdriniaeth, a meddai: “Y ffordd rydw i’n edrych arno, dyma un o’r ysbytai gorau ym Mhrydain, felly mae’n debyg bod gen i rai o’r meddygon gorau.”

Dewisodd Lewis, sydd wedi gweithio yn Ysbyty Athrofaol Cymru ers 2021, lawdriniaeth fasgwlaidd fel arbenigedd oherwydd ei heffaith. “ Mae'r cyflyrau hyn yn bygwth coesau neu'n bygwth bywyd. Mae'n fywyd neu’n aelod o’r corff. Mae'n gymysgedd o lawdriniaeth fawr iawn, a llawdriniaeth gain, ysgafn hefyd. 

“Pan fyddwch chi'n gweld rhywun yn y clinig wedyn, yn mynd yn ôl i fyw'n annibynnol neu maen nhw’n ddi-boen, dyna sy'n gwneud i chi feddwl 'dyma pam rydw i'n gwneud yr hyn rydw i'n ei wneud'.  Dyna’r peth sy'n eich cadw i ddod yn ôl.”