Penodi Abigail Harris yn Brif Gomisiynydd Dros Dro ar gyfer Cydbwyllgor Comisiynu (JCC) newydd GIG Cymru a threfniadau interim ym Mwrdd Iechyd Prifysgol Caerdydd a'r Fro
19 Mawrth 2024
Mae’n bleser gennym gyhoeddi bod Abigail Harris wedi’i phenodi’n Brif Gomisiynydd Dros Dro ar gyfer Cydbwyllgor Comisiynu (JCC) newydd GIG Cymru a fydd yn cael ei sefydlu ar 1 Ebrill 2024 yn dilyn uno’r cyn Bwyllgor Gwasanaethau Ambiwlans Brys (EASC), yr Uned Gomisiynu Gydweithredol Genedlaethol (NCCU) a Phwyllgor Gwasanaethau Iechyd Arbenigol Cymru (WHSSC).
Mae Abi, sydd ar hyn o bryd yn Gyfarwyddwr Gweithredol Strategaeth a Chynllunio gyda Bwrdd Iechyd Prifysgol Caerdydd a’r Fro, yn dod ag ystod eang o brofiad i’r rôl newydd hon gan gynnwys amser a dreuliwyd mewn sefydliadau comisiynu, llywodraeth leol, ar bolisi cenedlaethol ac yn darparu gwasanaethau arbenigol. Yn dilyn proses gyfweld, gwnaeth Abi greu argraff ar y panel gyda’i ffocws ar sicrhau bod y JCC newydd yn comisiynu gwasanaethau teg a seiliedig ar dystiolaeth i bobl Cymru, yn ogystal â’i huchelgais bod y tîm sy’n gweithio i’r pwyllgor newydd yn cael eu cefnogi a’u cynnwys yn y gwaith o ddatblygu diwylliant a gwerthoedd y pwyllgor.
Bydd Abi yn ymuno â’r JCC ar 4 Ebrill 2024 a bydd yn gyfrifol am arwain y gwaith o sefydlu’r sefydliad newydd.
Dywedodd Abi “Rwy’n falch iawn o fod yn rhan o gyfnod newydd a chyffrous ar gyfer comisiynu yng Nghymru ac arwain y tîm, er mai dros dro y bydd hynny, i gefnogi Byrddau Iechyd i ddatblygu’r gwaith o gomisiynu Byrddau Rhanbarthol a Rhyng-Iechyd. Bydd y JCC yn adeiladu ar waith y sefydliadau comisiynu blaenorol ac yn helpu i feithrin gallu comisiynu ar draws y system iechyd yng Nghymru. Rwy’n gweld hwn yn gyfle cyffrous iawn i ddod ag arbenigedd cyfunol y staff o dri sefydliad ar wahân a gwahanol yn eu rhinwedd eu hunain, i mewn i un sefydliad comisiynu cydlynol er budd cleifion a chymunedau Cymru. Bydd yn hanfodol adeiladu ar brofiad cydweithwyr o’r tri sefydliad ac rwy’n edrych ymlaen yn fawr at weithio ochr yn ochr â nhw.”
Ar hyn o bryd, rydym yn y broses o gwblhau'r manylion ar gyfer swydd y Cyfarwyddwr Gweithredol Strategaeth a Chynllunio dros dro yn ystod penodiad Abi, a byddwn yn gwneud cyhoeddiad pellach yn fuan.
Dymunwn yn dda i Abi yn y penodiad newydd a chyffrous hwn i Gymru.
--
Suzanne Rankin
Prif Weithredwr