Mentrau Eithriadol: Tîm Caerdydd yn cael eu hanrhydeddu am eu gwaith ym maes rhoi organau

26 Mehefin 2025

Mae Bwrdd Iechyd Prifysgol Caerdydd a'r Fro yn falch iawn o gyhoeddi bod cydweithwyr sydd wedi'u lleoli yn Ysbyty Athrofaol Cymru wedi ennill y Fenter Hyrwyddo Eithriadol yng Ngwobrau Gwaed a Thrawsblaniadau’r GIG / Cymdeithas Trawsblaniadau Prydain y Gyd-Gyngres 2025. 

Mae'r Nyrsys Arbenigol Katie Edwards a Jenny Holmes o Dîm Rhoi Organau De Cymru wedi derbyn gwobr am eu gwaith yn hyrwyddo rhoi organau ac annog teuluoedd i wneud eu penderfyniad yn hysbys. 

Mae'r rhestr aros am drawsblaniadau yn cynyddu bob blwyddyn, gan gyrraedd cyfanswm o fwy nag 8,000 o bobl bellach gan gynnwys babanod a phlant. Yn anffodus, mae 2-3 o bobl yn marw bob dydd wrth aros am drawsblaniad sy’n gallu achub eu bywyd.

Y broses rhoi organau

Mae gan weithwyr gofal iechyd proffesiynol ddyletswydd gofal i achub eich bywyd yn gyntaf. Os yw marwolaeth yn anochel er gwaethaf eu hymdrechion gorau, bydd rhoi organau a meinweoedd yn cael ei ystyried fel rhan o drafodaethau gofal diwedd oes arferol. Dim ond 1% o bobl sy'n marw mewn amgylchiadau lle mae organau'n addas ar gyfer trawsblannu, gan fod yn rhaid i gleifion gael eu hawyru a bod mewn amgylchedd Gofal Critigol. Mae'r Nyrsys Arbenigol mewn Rhoi Organau, Katie a Jenny, yn cefnogi teuluoedd drwy gydol y broses o roi organau ac yn sicrhau bod rhoddwyr yn cael eu trin â'r gofal a'r parch mwyaf.

Yn ystod y misoedd diwethaf yn Ysbyty Athroafol Cymru mae mwy o roddwyr nag a ddisgwyliwyd wedi bod o'i gymharu â blynyddoedd blaenorol, gan achub bywydau pobl ledled y wlad trwy'r rhodd fwyaf hael ac anhunanol y gall unrhyw un ei rhoi. 

Mae Tîm Rhoi Organau De Cymru yn cynnwys 17 o bobl, gan gynnwys 5 Nyrs Arbenigol sydd wedi'u lleoli yn yr Adran Gofal Critigol yn Ysbyty Athrofaol Cymru. Pan nad ydynt ar alwad, gellir dod o hyd i'r tîm yn addysgu, yn hysbysebu ac yn hyrwyddo rhoi organau. Mae'r tîm yn gofalu am roddwyr organau a'u teuluoedd ledled De Cymru ac yn aml yn cefnogi eu cydweithwyr yn Lloegr.

Ennill y Wobr

Gwnaeth Katie a Jenny, a gafodd ganmoliaeth eang am eu canlyniadau a oedd yn uwch na chyfartaledd y diwydiant ar gyfer ymgysylltiad, ennill y wobr Hyrwyddo Eithriadol am eu cydweithrediad â'r tîm hoci iâ elît The Cardiff Devils yn Arena Vindico ym Mae Caerdydd.

Penderfynwyd y byddai partneriaeth â’r Cardiff Devils yn berffaith oherwydd eu bod yn cael 500,000 o ymwelwyr bob blwyddyn yn Vindico Arena. Mae’r Cardiff Devils wedi bod yn hyrwyddo pwysigrwydd 'Gwneud Eich Penderfyniad yn Hysbys' trwy bosteri, eu dilynwyr enfawr ar y cyfryngau cymdeithasol, hysbyseb teledu ar y llawr sglefrio iâ a goleuo'r arena'n binc ar gyfer Wythnos Rhoi Organau. Yn ogystal, maen nhw wedi darlledu cyfweliad fideo gyda chefnogwr hoci sydd wedi derbyn trawsblaniad aren a Jenny hefyd fel Nyrs Arbenigol mewn rhoi organau.

O ganlyniad i'r bartneriaeth, mae'r tîm wedi meithrin cysylltiadau ychwanegol ag Undeb Rygbi Cymru ac wedi arddangos yr ymgyrch yng ngemau Cymru yn erbyn Lloegr, Iwerddon a De Affrica.

Wrth siarad am y wobr, dywedodd y Nyrsys Arbenigol, Katie Edwards a Jenny Holmes: “Mae’r wobr hon yn dyst i waith caled yr holl dîm a’r Cardiff Devils. Rydym am hyrwyddo ymwybyddiaeth o roi organau ac i bobl wneud eu penderfyniadau'n hysbys ar y gofrestr rhoddwyr organau a chyda'u hanwyliaid. Yn ei dro, bydd hyn yn helpu i achub bywydau.”

Gwnewch eich bwriadau'n hysbys

Mae rhoi organau yn weithred wirioneddol anhunanol ac yn seiliedig ar ewyllys da pobl yn ystod eu dyddiau olaf. Ers 2015, mae Cymru wedi gweithredu deddfwriaeth caniatâd tybiedig, lle tybir bod unigolyn yn cydsynio i roi organau ar ôl marwolaeth oni bai ei fod wedi datgan yn wahanol yn benodol neu ei fod mewn grŵp eithriedig. Er gwaethaf hyn, mae cefnogaeth teuluoedd yn hanfodol gan y gallant ddiystyru penderfyniad. Dyma pam rydyn ni eisiau i bawb siarad â'u hanwyliaid a chofrestru eu penderfyniad i roi organau.

Mae'n cymryd dwy funud – llai o amser nag sydd ei angen i wneud paned o de – a gallai'r penderfyniad hwn i roi rhodd achub bywyd hyd at naw o bobl yn y dyfodol.