Mae nyrs Bwrdd Iechyd Prifysgol Caerdydd a'r Fro sy'n ymroddedig i gefnogi pobl ifanc â diabetes wedi derbyn gwobr genedlaethol fawreddog am ei gwaith anhygoel
18 Hydref 2023
Mae Rachael Humphreys yn Nyrs Arbenigol Diabetes Pediatrig yn Ysbyty Arch Noa i Blant Cymru ac mae wedi ennill Gwobr Cyfraniad Eithriadol GIG Cymru am Wasanaethau i Ddiabetes yng Ngwobrau Diabetes Ansawdd mewn Gofal (QiC).
Graddiodd Rachael fel nyrs bediatrig yn 2010 ac mae wedi gweithio’n ddiflino i wella bywydau plant ac oedolion ifanc sy’n byw gyda diabetes yng Nghymru.
Yn 2014, cafodd ei secondio i astudiaeth EDDY (Canfod Diabetes Math 1 yn Gynnar mewn Ieuenctid), gan weithio yn y gymuned gydag ysgolion a meddygfeydd teulu i godi ymwybyddiaeth o arwyddion cynnar Diabetes Math 1 i geisio lleihau nifer y plant sy’n profi Cetoasidosis Diabetig.
Yn dilyn hyn, ymunodd â thîm diabetes pediatrig BIP Caerdydd a’r Fro fel PDSN yn 2016 ac mae bellach yn gydlynydd arweiniol ar gyfer addysg ysgol — yn trefnu ac yn arwain Diwrnod Symud i Ysgol Uwchradd SEREN ar gyfer plant sy’n mynd i Flwyddyn 7 a threfnu a hwyluso addysg staff ysgol drwy gydol y flwyddyn ysgol.
Rachael hefyd yw’r arweinydd ar gyfer Diabetes Math 1 ac Anhwylderau Bwyta (T1DE) o fewn ei gwasanaeth, gan weithio ar y cyd â'r tîm Anhwylderau Bwyta i gefnogi cleifion sy'n profi T1DE.
Arweiniodd ddau brosiect yn archwilio profiad bywyd T1DE gydag oedolion ifanc, gan weithio gyda Breathe Creative ar Nofio gyda T1DE, a dderbyniodd Ganmoliaeth yng Ngwobrau Diabetes QIC 2023 ac sy’n cael ei gyflwyno fel eBoster yng Nghynhadledd ISPAD eleni, ac yn fwyaf diweddar Sgyrsiau T1DE, sy’n archwilio profiadau mwy unigol o T1DE. Trefnodd hefyd y Gynhadledd T1DE Broffesiynol Cymru Gyfan gyntaf ym mis Medi, a noddwyd yn garedig gan Diabetes UK Wales.
Yn 2022, cafodd Rachael ei secondio fel Arweinydd Prosiect Cymru Gyfan ar gyfer Diabetes Math 1 ac Anhwylderau Bwyta, gan gefnogi a rhwydweithio gyda gwasanaethau ac arweinwyr clinigol ledled Cymru, o fewn gwasanaethau anhwylderau bwyta, iechyd meddwl a diabetes oedolion a phlant.
Wrth siarad am ei gwobr, dywedodd Rachael: “Ces i sioc fawr i dderbyn y wobr, roedd yn gwbl annisgwyl. Doeddwn i ddim yn sylweddoli bod Dr Julia Platts yn siarad amdanaf nes iddi sôn am y rolau addysg ysgol ac anhwylderau bwyta yr wyf yn eu cyflawni yn ein gwasanaeth pediatrig.
“Rwyf bob amser wedi ymdrechu i gefnogi’r cleifion yn ein gwasanaeth hyd eithaf fy ngallu ac yn mwynhau trefnu ac arwain ar brosiectau a gwella gwasanaethau. Yn ystod yr ychydig flynyddoedd diwethaf rwyf wedi bod yn gweithio'n galed iawn i godi ymwybyddiaeth o T1DE a hyrwyddo cydweithio a gwaith tîm amlddisgyblaethol i'r rhai sy'n profi T1DE.
“Fyddwn i ddim wedi gallu creu’r gwaith na gyrru’r gwasanaeth yn ei flaen heb yr oedolion ifanc sy’n fodlon rhannu eu profiadau gyda mi.”
Os nad yw ei gwasanaeth i ddiabetes yn ddigon, mae Rachael—sydd â syndrom Behçet—hefyd yn Ymddiriedolwr ar gyfer Behçet’s UK, yn cefnogi ac yn eirioli dros gleifion ledled Cymru sydd â’r cyflwr prin hwn ac yn gweithio gyda Genetic Alliance UK a Rare Disease UK i godi ymwybyddiaeth. Mae hi’n cyflwyno ei phrofiad bywyd yn flynyddol i Fyfyrwyr Meddygol trydedd flwyddyn yn ystod eu hwythnos clefydau prin ym Mhrifysgol Caerdydd.
Mae QiC Diabetes yn cydnabod, yn gwobrwyo ac yn rhannu arferion arloesol sy'n dangos ansawdd mewn rheoli diabetes, addysg a gwasanaethau i bobl â'r cyflwr a/neu eu teuluoedd.
Mynychodd mwy na 100 o bobl y seremoni, a gynhaliwyd ar nos Iau, 12 Hydref yn Reading, pencadlys Sanofi yn y DU.