"Mae Huw wedi dod â phawb yn agosach" – Dathlu Wythnos Anabledd Dysgu

Trwy ei interniaeth gyda Project SEARCH, mae Huw Williams wedi dod â brwdfrydedd, ymroddiad a gwaith caled i bob adran y mae wedi gweithio ynddi ar draws y bwrdd iechyd. Mae ei brofiad nid yn unig wedi caniatáu iddo dyfu ar lefel bersonol ond hefyd wedi cael effaith gadarnhaol ac ystyrlon ar dimau o'i gwmpas. 

Mae'r rhaglen Project SEARCH yn cynnig interniaethau â chymorth i bobl ifanc ag awtistiaeth a/neu anableddau dysgu, sy'n eu harfogi â'r wybodaeth a'r sgiliau angenrheidiol sydd eu hangen arnynt i gael swyddi ystyrlon â thâl.  

Mae'r wythnos hon yn nodi Wythnos Anabledd Dysgu, cyfle i ddathlu'r hyn y mae pobl ag anabledd dysgu yn ei roi i gymdeithas. Mae Bwrdd Iechyd Prifysgol Caerdydd a'r Fro yn falch o gefnogi cynllun Project SEARCH a'n interniaid, sy'n cael effaith hynod gadarnhaol ar y timau maen nhw'n gweithio gyda nhw. 

Ers i Huw, sy'n 18 oed, gymryd rhan yn Project SEARCH ddwy flynedd yn ôl, mae wedi gweithio mewn gwahanol adrannau ar draws y bwrdd iechyd, o Siopau Trafnidiaeth, Radioleg a Phorthora i Ddosbarthu CPU a Chofnodion Meddygol. Mae profiad Huw wedi rhoi cyfle iddo wella llawer o sgiliau gwerthfawr a chwrdd â phobl newydd. 

"Cofnodion Meddygol yw fy hoff leoliad," meddai Huw. "Mae'r rôl yn addas i mi a'm set sgiliau gan fy mod i'n hoffi symud o gwmpas llawer, ac mae fy nghydweithwyr wedi bod yn groesawgar, yn gyfeillgar, yn garedig ac yn gefnogol." 

Mae Huw wedi gwneud ffrindiau newydd trwy gydol ei leoliadau gwahanol.  Dywedodd: "Pan fyddaf yn cerdded trwy'r ysbyty, mae'n braf bod pobl yn dweud helo wrthyf. 

 "Rwyf wedi datblygu llawer o sgiliau yn ystod fy amser ar y rhaglen, gan gynnwys sgiliau cyfathrebu, defnyddio fy menter fy hun, sgiliau llywio, sgiliau TG a rheoli amser." 

Mae'r rhaglen nid yn unig wedi bod yn wych i Huw, ond mae hefyd wedi bod yn brofiad gwerth chweil iawn i'r timau y mae wedi gweithio gyda nhw. 

Mae Joe Macey yn gweithio fel Goruchwyliwr Cofnodion Iechyd ym Mwrdd Iechyd Prifysgol Caerdydd a'r Fro.  

"Mae gweithio gyda Huw a thîm Project SEARCH wedi bod yn hynod werth chweil," meddai Joe.  

"Rwy'n credu bod Huw wedi dod â phawb yn agosach. Rydym yn adran sy'n canolbwyntio ar waith tîm, ond mae’r ffaith bod pob un ohonom wedi dod at ein gilydd i gefnogi Huw a gweithio ochr yn ochr ag ef wedi dangos y gorau ym mhawb." 

"Unwaith y bydd yn rhoi ei feddwl ar dasg, nid yw'n stopio nes ei fod wedi'i orffen a'i wneud yn gywir. " Mae Huw gymaint yn rhan o'r tîm ag unrhyw un arall. Mae wedi bod yn bleser llwyr gweithio gydag ef a'i wylio'n tyfu'n fwy hyderus a chyfforddus." 

Mae Huw yn bwriadu symud ymlaen i raglen Twf Swyddi Cymru+ yn dilyn ei interniaeth, a fydd yn caniatáu iddo ennill hyd yn oed mwy o sgiliau a phrofiad. Ei obaith hirdymor ar gyfer y dyfodol yw dychwelyd i'r adran Cofnodion Meddygol ym Mwrdd Iechyd Prifysgol Caerdydd a'r Fro fel gweithiwr, a gweithio ochr yn ochr â'r tîm. 

Mae Bwrdd Iechyd Prifysgol Caerdydd a’r Fro wedi ymrwymo i hybu cydraddoldeb ac adeiladu diwylliant cynhwysol yn y gweithle, lle caiff pawb eu trin â pharch ac urddas a lle mae pawb yn teimlo eu bod yn cael eu gwerthfawrogi.  

Rydym yn falch o gymryd rhan yn y cynllun cyflogwr Hyderus o ran Anabledd a weithredir gan yr Adran Gwaith a Phensiynau.  Mae'r cynllun yn cefnogi cyflogwyr i wneud y gorau o'r doniau y gall pobl anabl eu cynnig i'r gweithle. Darllenwch fwy am nodau’r Bwrdd Iechyd i gyflawni gweithlu cynhwysol yn shapingourfuturewellbeing.com 

I gael rhagor o wybodaeth am brofiad gwaith a chyfleoedd eraill i bobl ifanc, ewch i’n tudalen profiad gwaith. I gael rhagor o wybodaeth am DFN Project SEARCH, ewch i’w gwefan.