'Mae Angela wedi bod yn achubiaeth lwyr i ni' | Cyfarfod ag Arwr Iechyd Mis Awst

25 Awst 2025

Mae Angela Amey-Jones, Ymwelydd Iechyd Canolfan Feddygol Radur yng Ngorllewin Caerdydd, wedi cael ei henwi'n Arwr Iechyd mis Awst i gydnabod y gefnogaeth ddiwyro a'r effaith ystyrlon y mae'n ei darparu i'r teuluoedd y mae'n gweithio gyda nhw.

Dechreuodd Angela ei gyrfa gyda Bwrdd Iechyd Prifysgol Caerdydd a'r Fro yn 2011 fel bydwraig. Yn dilyn y pandemig COVID-19, roedd hi'n teimlo'n barod am her newydd. I ddod yn ymwelydd iechyd, rhaid i weithwyr proffesiynol fod yn nyrs neu fydwraig gofrestredig yn gyntaf, ac yna cwblhau hyfforddiant ôl-raddedig i fod yn gymwys fel Nyrs Iechyd Cyhoeddus Cymunedol Arbenigol, a dyma wnaeth Angela yn 2022.

"Roeddwn i wrth fy modd yn gweithio fel bydwraig. Roeddwn i'n meddwl ei fod yn fy ngwaed," meddai Angela. "Ond mae bod yn ymwelydd iechyd yn caniatáu i mi ddefnyddio llawer o fy mhrofiad bydwreigiaeth hefyd. Rydym yn dilyn rhaglen Plant Iach Cymru sy'n cefnogi teuluoedd â phlant o'u geni hyd at bump oed.

"Y nod yw sicrhau bod plant yn datblygu, symud ymlaen ac yn cyrraedd eu potensial llawn. Felly gobeithio y gallwn nodi unrhyw broblemau yn gynnar a gwneud yr atgyfeiriadau angenrheidiol fel bod plant, a'u teuluoedd, yn cael y gefnogaeth sydd ei hangen arnynt."

Gall llawer o waith ymwelwyr iechyd fynd heb ei weld, ond mae eu rôl yn hanfodol o ran gofal y blynyddoedd cynnar.

Dywedodd Angela: "Pan fydd popeth yn mynd yn dda, nid yw pobl yn aml yn sylweddoli beth mae ymwelwyr iechyd yn ei wneud. Ond mae yna lawer o waith yn cael ei wneud y tu ôl i'r llenni i gefnogi teuluoedd i lywio amseroedd anodd. Gallai fod gyda chyflwr iechyd sydd angen cymorth ychwanegol, pryderon o ran ymddygiad neu ddatblygiad. Rydym yn gweithio gydag ystod o glinigwyr ac asiantaethau - o ddeietegwyr, ffisiotherapyddion, diogelu, awdioleg - i roi’r help iawn ar waith."

Cafodd Angela ei henwebu gan Jessica Franks y ganwyd ei mab ym mis Mawrth gydag anghenion meddygol cymhleth. Ysgrifennodd Jessica: 'Mae Angela wedi bod yn achubiaeth lwyr i ni ers y diwrnod y cyfarfu â Morgan. Mae hi wedi dod yn rhan hanfodol o'n bywydau yn ymweld â ni yn wythnosol ac yn cerdded y daith hon ochr yn ochr â ni.

"Mae hwn wedi bod yn amser anodd ac emosiynol iawn i ni i gyd. Mae Angela wedi bod yn ffynhonnell gyson o gryfder, gofal a sicrwydd trwy'r amser. Mae hi wedi mynd gam ymhellach - nid yn unig wrth gefnogi anghenion Morgan, ond wrth ofalu amdanaf fel mam, gan gynnig cefnogaeth emosiynol, cymorth ymarferol, a blaengynllunio bob amser.

"Mae hi wedi dod o hyd i gydweithwyr ag arbenigedd newyddenedigol i ymweld â ni, wedi gwneud atgyfeiriadau cynnar, a sicrhau nad oeddem byth yn teimlo'n unig nac wedi ein hanghofio. Mae hi'n cynnwys fy mab hŷn gyda chymaint o garedigrwydd hefyd, gan wneud yn siŵr ei fod ef yn teimlo yr un mor bwysig pan fydd hi'n ymweld ac yn treulio amser gydag ef. Dwi wir ddim yn gwybod sut y byddem wedi ymdopi hebddi hi. Mae hi'n haeddu cydnabyddiaeth am yr effaith ystyrlon y mae hi wedi'i chael ar ein teulu, ac rydym yn wirioneddol ddiolchgar am bopeth mae hi wedi'i wneud."

Wrth fyfyrio ar enwebiad Jessica, dywedodd Angela: "Alla i ddim credu, gyda phopeth sy'n digwydd, bod Jess wedi rhoi o’i hamser i ysgrifennu rhywbeth mor hyfryd. Ond dim ond adlewyrchiad o'r hyn y mae ymwelwyr iechyd yn ei wneud bob dydd ledled Caerdydd a'r Fro yw hyn. Rwy'n ffodus iawn ei bod hi wedi cymryd yr amser i ysgrifennu hynny oherwydd mae fy nghydweithwyr hefyd yn mynd gam ymhellach bob dydd.”

Yn ogystal ag ymweliadau cartref, mae'r tîm Ymwelwyr Iechyd yn cynnal clinigau babanod mewn meddygfeydd ac yn y gymuned. Maent yn nyrsys hyfforddedig ac yn cynnig cymorth ar ystod eang o faterion o fwydo, ymddygiad a ymataliaeth i bryderon o ran datblygiad ac asesiadau niwroddatblygiadol.

Dywedodd Angela: "Mae'n anrhydedd cael eich gwahodd i gartrefi teuluoedd, pan maen nhw'n cael profiad hyfryd o gael babi. Ond ar adegau pan mae teuluoedd angen y gefnogaeth ychwanegol honno, fel y teulu sydd wedi fy enwebu, mae'n fraint gallu eu cefnogi."

Noddir y wobr Arwr Iechyd yn garedig gan Park Plaza Caerdydd. Fel Arwr Iechyd mis Awst, bydd Angela yn derbyn te prynhawn traddodiadol i ddau.

Ydych chi'n adnabod aelod o staff sydd wedi mynd gam ymhellach i ddarparu gofal rhagorol? Dywedwch ddiolch trwy eu henwebu fel Arwr Iechyd!