IWD 2025 | Dewch i gwrdd â'r tîm ymchwil sy'n helpu i wella canlyniadau iechyd i fenywod
06 Mawrth 2025
Mae Bwrdd Iechyd Prifysgol Caerdydd a’r Fro yn falch o gefnogi Diwrnod Rhyngwladol y Menywod 2025. Y thema eleni yw Cyflymu Gweithredu sy'n pwysleisio'r brys i hyrwyddo cydraddoldeb rhywiol ac rydym yn tynnu sylw at y Tîm Ymchwil Obstetreg a Gynaecoleg.
Mae’r Tîm Ymchwil Obstetreg a Gynaecoleg wedi ymrwymo i wella canlyniadau iechyd i bob menyw a pherson sy’n geni, drwy ymchwil arloesol ac astudiaethau clinigol.
Mae’r tîm yn cynnwys amrywiaeth o weithwyr proffesiynol profiadol a thalentog sy’n frwd dros wella a datblygu arfer, gyda menywod wrth galon eu gwaith. O ymchwil i sepsis mamol, pwysedd gwaed uchel a gwaedu yn ystod genedigaeth i endometriosis, canser a llawdriniaeth robotig—mae’r tîm yn gweithio’n galed i wella gofal iechyd i fenywod drwy bob cyfnod o fywyd.
Mae Dr Sarah Bell yn anesthetydd obstetrig ac mae ganddi ddiddordeb arbennig mewn iechyd menywod. Mae'n gweithio fel anesthetydd ymgynghorol ac ymchwilydd clinigol ac mae wedi bod yn ymwneud ag ymchwil iechyd menywod am y 10 mlynedd diwethaf.
Dywed: “Y rheswm dwi’n caru ymchwil gymaint yw oherwydd ei fod yn ffordd o geisio gwneud pethau’n well. Mae gwneud ymchwil yn golygu eich bod bob amser yn dysgu ac yn meddwl am y ffyrdd gorau o wneud pethau ar gyfer eich cleifion.
“Un o themâu allweddol ein hymchwil yw gwella gofal i bawb. Gwyddom fod menywod a phobl sy'n geni o boblogaethau lleiafrifol yn cael canlyniadau gwahanol o ran ystadegau genedigaethau a rhywbeth yr ydym yn awyddus iawn i'w wneud yw gwella canlyniadau i bawb.”
Mae Hannah Ritter wedi bod yn fydwraig ers 11 mlynedd ac wedi cymryd rhan mewn ymchwil ers 2021.
Dywedodd: “Mae iechyd menywod wedi bod yn faes sydd wedi’i dangynrychioli mewn ymchwil, felly mae’n wych bod yn rhan o lawer o astudiaethau ymchwil sy’n canolbwyntio’n wirioneddol ar fenywod. Mae llawer o dystiolaeth wedi bod yn eithaf hanesyddol, felly mae bod yn rhan o brosiectau arloesol wedi bod yn wych.”
Mae gan Arweinydd y Tîm Ymchwil Obstetreg a Gynaecoleg, Claire Bertorelli flynyddoedd o brofiad clinigol yn gweithio fel nyrs yn gyntaf cyn dod yn fydwraig. Syrthiodd mewn cariad ag ymchwil ar ôl gweld sut y gallai helpu i gyfrannu ar lefel fwy.
“Y rhan orau i mi yw helpu ar lefel hollol wahanol,” meddai. “Mewn ymchwil rydych chi'n gweld eich bod chi'n gwella ymarfer yn ddyddiol - dyna un o'r ysgogwyr mwyaf i mi.”
I Sophie Whyatt, gweinyddydd treial ar gyfer y Tîm Ymchwil Obstetreg a Gynaecoleg, y rhan orau am weithio ym maes ymchwil menywod yw “bod yn rhan o’r gwaith i gau’r bwlch iechyd rhwng y rhywiau”.
Mae Sophie yn chwarae rhan hanfodol yn y tîm, gan gwblhau gwaith cefndir fel dogfennaeth gyfreithiol a chefnogi prosesau sgrinio.
“Mae ymwneud ag ymchwil i fenywod ar hyd eu hoes yn anhygoel i fod yn rhan ohono – ac mae mor ddiddorol ar lefel bersonol hefyd,” meddai.
Wrth i ni ddathlu Diwrnod Rhyngwladol y Menywod 2025, mae ymroddiad a gwaith anhygoel y Tîm Ymchwil Obstetreg a Gynaecoleg yn ein hatgoffa’n bwerus o’r effaith gadarnhaol y gall ymchwil ei chael ar wella canlyniadau iechyd i bawb