Hyb Seiclo Newydd yn Ysbyty Athrofaol Cymru
28 Rhagfyr 2022
Mae Bwrdd Iechyd Prifysgol Caerdydd a’r Fro wedi agor ei gyfleuster seiclo diogel newydd ar gyfer staff ar safle Ysbyty Athrofaol Cymru, fel rhan o’i ymrwymiad i annog teithio cynaliadwy.
Cafodd yr hyb newydd ei ddatblygu yn dilyn adborth gan staff ar sut i wella cyfleusterau seiclo a theithio llesol ar draws y bwrdd iechyd. Bydd yr hyb seiclo yn cynnwys storfa ddwy haen ar gyfer 90 o feiciau yn ogystal â chyfleusterau newid, dwy gawod neillryw, toiled ac ystafell sychu. Dyluniwyd y cyfleuster newydd gan ddefnyddio’r dechnoleg ddiweddaraf, mae ganddo gladin pren ac mae wedi’i inswleiddio’n dda i leihau’r defnydd o ynni. Wedi’i leoli gyferbyn ag Ysbyty Arch Noa i Blant Cymru, bydd y cyfleuster diogel yn cael ei fonitro gan deledu cylch cyfyng, gydag aelodau o staff yn cael mynediad drwy ddefnyddio eu cerdyn adnabod.
Cafodd yr hyb newydd ei ddatblygu gan Wernick, contractwyr lleol o Bort Talbot, gyda’r cyfleuster yn cael ei adeiladu oddi ar y safle ac yna’n cael ei osod a’i gysylltu â chyflenwadau dŵr, draenio a thrydan ar y safle.
Dywedodd Geoff Walsh, Cyfarwyddwr Cyfalaf, Ystadau a Chyfleusterau: “Bydd y cyfleuster newydd hwn yn chwarae rhan bwysig wrth greu lle dibynadwy a diogel i storio beiciau. Rydym wedi ymgynghori â chydweithwyr sydd eisoes yn seiclo i’r gwaith i ofyn iddynt gyfrannu at y cynlluniau i sicrhau bod y cyfleuster yn diwallu anghenion beicwyr a theithwyr llesol. Bydd y cyfleuster hwn yn helpu i ehangu mynediad ar feic i Ysbyty Athrofaol Cymru ac yn cefnogi ein hymrwymiadau i hyrwyddo teithio iach a chynaliadwy, yn ogystal â chynllun teithio cynaliadwy Cyngor Caerdydd ar gyfer y ddinas.”
Mae Mike Mullan, Rheolwr Gwybodaeth am y Gweithlu ym Mwrdd Iechyd Prifysgol Caerdydd a’r Fro, yn seiclwr a bu’n rhan o’r cynlluniau ar gyfer y cyfleuster newydd. Dywedodd, “Gwnaeth y cynlluniau argraff fawr arnaf ac fe awgrymais un neu ddau o ychwanegiadau gan gynnwys loceri, a drychau a sychwyr gwallt a allai fod yn ddefnyddiol i staff. Rwy’n credu y bydd y cyfleuster yn annog mwy o staff i seiclo i’r gwaith ar safle Ysbyty Athrofaol Cymru.”
Y llynedd, datblygodd Cyngor Caerdydd gynigion ar gyfer pum Llwybr Seiclo i gefnogi a hyrwyddo seiclo i brif gyrchfannau ledled y ddinas. Bydd y llwybrau arfaethedig yn cysylltu cymunedau â phrif gyrchfannau ledled y ddinas, sydd hefyd yn cynnwys Llwybr Seiclo o Heol Allensbank i Ysbyty Athrofaol Cymru.
Drwy gydweithio ac ystyried y tymor hir, nod sefydliadau’r sector cyhoeddus yn y ddinas yw cynyddu cyfran y teithiau cynaliadwy a wneir yn ôl ac ymlaen i weithleoedd, gan leihau’r effaith ar yr amgylchedd a gwella iechyd pobl yng Nghaerdydd a’r Fro, nawr ac yn y dyfodol.