"Fe wnes i roi'r gorau i smygu ar ôl 40 mlynedd - ac o fewn wythnosau gwelais fy iechyd yn gwella"

29.01.2025

Roedd Nabil Hassoun, sy'n dad i ddau o blant, yn smygwr trwm am fwy na phedwar degawd.

Cafodd y dyn 63 oed ei sigarét gyntaf yn ei ugeiniau cynnar wrth gymdeithasu gyda ffrindiau gyda'r nos, ond daeth yn arferiad mwy difrifol yn fuan.

“Dechreuodd gyda phedwar neu bump [y diwrnod] ac yna fe gynyddodd yn raddol i becyn neu 15,” esboniodd y cyn-werthwr tai o’r Rhath, Caerdydd.

“Daeth smygu yn ffordd a oedd yn fy helpu i aros yn effro a chanolbwyntio, yn enwedig pan oeddwn dan straen o’r gwaith neu angen gyrru i rywle. Llwyddodd i roi ffocws i mi - neu dyna a feddyliais.”

Cyn hir, dechreuodd Nabil weld dirywiad yn ei iechyd a'i les. Dechreuodd gerdded llai a byddai'n mynd allan o anadl hyd yn oed wrth ddringo'r grisiau gartref.

Daeth pethau i’r pen ym mis Medi 2024 pan dreuliodd ddwy noson yn Ysbyty Athrofaol Cymru yng Nghaerdydd gyda haint ar y frest.

Ar ôl profion archwiliadol, cadarnhaodd meddygon fod ganddo glefyd rhwystrol cronig yr ysgyfaint (COPD), grŵp o gyflyrau ar yr ysgyfaint sy'n achosi anawsterau anadlu difrifol.

Er mawr sioc iddo, darganfu fod gallu ei ysgyfaint - bron yn gyfan gwbl oherwydd ei flynyddoedd o smygu trwm - mor isel â 2%.

“Dywedodd y meddyg ymgynghorol wrthyf mai nawr oedd yr amser i roi’r gorau iddi fel arall byddai fy iechyd yn gwaethygu hyd yn oed ymhellach. Roedd hwnnw’n ergyd go iawn,” cyfaddefodd.

Ar ôl cael ei ryddhau o'r ysbyty, cynghorwyd Nabil gan nyrs yn ei feddygfa i geisio cymorth wyneb yn wyneb am ddim trwy Helpa Fi i Stopio, gwasanaeth rhoi'r gorau i smygu sy'n cael ei redeg gan y GIG.

Derbyniodd saith wythnos o gymorth wedi’i deilwra gan ymarferwr Helpa Fi i Stopio arbenigol a chafodd 12 wythnos o gynnyrch disodli nicotin gwerth £250 am ddim.

“Cefais drafodaethau neis iawn [gyda fy ymarferydd] ac fe wnaeth hi fy annog yn aruthrol. Roedd yn anodd i ddechrau oherwydd roeddwn i wedi arfer smygu cymaint o sigaréts y dydd,” ychwanegodd.

“Roeddwn yn gallu deall fy sbardunau ar gyfer smygu, a darganfyddais mai’r peth gorau i mi i ddisodli’r nicotin oedd y gwm cnoi.”

O fewn dim ond pythefnos i roi'r gorau iddi, dywedodd Nabil ei fod wedi gweld gwelliannau yn ei les cyffredinol.

“Rwy’n cysgu’n well nawr oherwydd weithiau roeddwn i’n arfer chwyrnu,” meddai. “Roeddwn i’n arfer deffro llawer gyda’r nos hefyd gan fy mod yn teimlo pwysau yn ddwfn y tu mewn i’m brest – ond mae hynny wedi mynd bellach. Rydw i nawr yn fwy tebygol o fynd allan am dro ac anadlu awyr iach.”

Pan ofynnwyd iddo roi ei gyngor i eraill sydd am geisio cymorth proffesiynol gan Helpa Fi i Stopio, dywedodd Nabil: “Rwyf am i bobl eraill sylweddoli y gallant roi’r gorau i smygu. Y cyfan sydd angen i chi ei wneud yw deall eich ffordd o fyw, archwilio'r sbardunau a darganfod pa driniaethau sy'n gweithio orau i chi.

“Mae’n fater o ewyllys, ynghyd â’r driniaeth a’r gefnogaeth gan yr ymarferwyr a’ch teulu.

“Yn y pen draw, eich bywyd chi yw e, a chi sydd i benderfynu sut rydych chi'n dewis ei fyw. Mae rhoi’r gorau i smygu yn daith ac efallai y byddwch yn baglu ar hyd y ffordd, ond cadwch ffocws.”

I gael rhestr lawn o wasanaethau rhoi’r gorau i smygu yn lleol, ac i gael gwybod a oes angen i chi drefnu apwyntiad ymlaen llaw, cysylltwch â thîm canolfan gyswllt Helpa Fi i Stopio drwy:

• Ffonio rhadffôn 0800 085 2219
• Tecstio HMQ at 80818 (cost neges destun yw un neges cyfradd safonol)
• Mynd i’r wefan Helpa Fi i Stopio  a gofyn am alwad yn ôl

Gall smygwyr hefyd gael eu cyfeirio at Helpa Fi i Stopio gan eu meddyg teulu neu nyrs practis, neu os ydyn nhw'n cael eu hunain yn yr ysbyty, gallant gael mynediad at Wasanaeth Rhoi’r Gorau i Smygu yr ysbyty a chynhyrchion disodli nicotin ar y safle cyn cael eu trosglwyddo'n ôl i'r gymuned. Mae rhai fferyllfeydd yng Nghaerdydd a Bro Morgannwg hefyd yn cynnig cyngor Helpa fi i Stopio a chynhyrchion disodli nicotin.