Dan Sylw - Nicole Lawson

14 Gorffennaf 2025

Y mis hwn, Nicole Lawson, trydanwr dan hyfforddiant yn nhîm Ystadau Ysbyty Athrofaol Llandochau sydd dan sylw.

Ymunodd Nicole â Bwrdd Iechyd Prifysgol Caerdydd a'r Fro fel ceidwad tŷ yn 2023 ac ar ôl 18 mis, cafodd ei dyrchafu i arweinydd tîm yn y tîm cadw tŷ Ymateb Cyflym.

Ymunodd â’r proffesiwn trydanol yn annisgwyl. Un diwrnod, wrth lanhau adeilad yr Ystadau, dechreuodd Nicole sgwrsio â rheolwr a sôn am ei diddordeb mewn gwaith coed – rhywbeth yr oedd wedi rhoi cynnig arno yn ystod ei gradd Meistr mewn Celfyddydau Cain. Gwahoddodd y rheolwr hi i wneud shifft gysgodi gyda saer coed, ond ar y diwrnod nid oedd unrhyw seiri coed ar gael, felly cysgododd y trydanwyr yn lle.

“Fe wnes i fwynhau’r profiad yn fawr,” meddai Nicole. “Roedd yn hynod ddiddorol.” Dechreuodd Nicole gysgodi'r trydanwyr yn rheolaidd ar ei diwrnodau i ffwrdd. “Alla i ddim pwysleisio digon pa mor dda mae’r tîm hwn wedi bod wrth ganiatáu i mi wneud hynny,” meddai hi. Ar ôl chwe mis, gwnaeth gais am y swydd a bu’n llwyddiannus.

Ymunodd Nicole â’r tîm Ystadau ym mis Awst 2024 fel Gweithredwr Amlddisgyblaethol, gan weithio tuag at ddod yn drydanwr cymwysedig llawn ymhen tair i bedair blynedd.

“Yr hyn maen nhw wedi’i roi i mi yma yw’r cyfle i hyfforddi a chymhwyso o fewn y bwrdd iechyd, sy’n anhygoel. Dw i wrth fy modd â'r ffaith ein bod ni'n cael helpu. Gallai nyrs alw am atgyweiriad brys, a gallai'r atgyweiriad hwnnw fod yn rhywbeth cwbl allweddol. Rydych chi'n cael y teimlad, 'Ydw, dw i wedi gwneud rhywbeth ystyrlon'. Roeddwn i'n teimlo felly pan oeddwn i'n glanhau hefyd, ond dyma fi'n dysgu ac yn gwneud cynnydd bob dydd.”

Mae hyfforddiant ar safle ysbyty yn cynnig ystod eang o brofiad, o gynnal a chadw offer theatr i drwsio socedi golau, i brofi generaduron, a sicrhau bod systemau larwm tân yn gweithio’n iawn. “Mae’n cwmpasu cymaint o bethau, boed yn beirianneg drydanol neu'n waith gosod,” meddai Nicole. “Mae'n teimlo'n dda iawn bod yn rhan o'r tîm lle rydych chi'n gwneud gwahaniaeth. I fod yn onest, mae trydan yn bwysig iawn i ysbyty.”

Mae Nicole hefyd yn gwerthfawrogi safonau uchel y bobl mae hi'n gweithio ochr yn ochr â nhw. “Mae’r tîm yn ymfalchïo ym mhopeth maen nhw’n ei wneud. Rwy'n dysgu sut i ymddwyn fel gweithiwr proffesiynol ac mae llawer o bwyslais ar gyfathrebu'n glir â rheolwr y ward, fel eu bod nhw'n gwybod popeth sy'n digwydd."

Mae hi'n ymwybodol mai hi yw’r gweithiwr benywaidd cyntaf ar y tîm. “Dydych chi ddim yn gweld llawer o fenywod yn y maes hwn,” meddai hi. “Roeddwn i eisiau eirioli dros fenywod a herio fy hun drwy weithio mewn amgylchedd sy’n cael ei ddominyddu gan ddynion - i weld a allwn i ei hacio. Yn ogystal â'r llif o wybodaeth, mae'r gwaith yn waith â llaw hefyd. Mae'n rhaid i chi geisio cadw i fyny â phawb arall. Rwyf am iddo fod yn gyfartal ar draws y bwrdd.”

Mae hi'n awyddus i roi clod i'w chydweithwyr am eu cefnogaeth. “Pan gewch chi’r bobl iawn y tu ôl i chi, maen nhw’n rhoi’r hyder hwnnw i chi sy’n gwneud i chi gredu yn eich hun. Mae'r tîm wedi bod yn gefnogol drwy gydol y daith gyfan.”

Mae'r hyfforddiant yn dod â'i heriau. “Gall fod yn rhwystredig ar adegau,” meddai Nicole. “Yn amlwg, dydw i ddim wedi cymhwyso’n llawn felly dydy popeth ddim yn gwneud synnwyr llwyr i mi. Ond pan fyddwch chi'n llwyddo i drwsio rhywbeth, pan fyddwch chi'n ei ddatrys ac yn cael rhywbeth i weithio unwaith eto, mae’n rhuthr adrenalin. Dw i wrth fy modd â'r gwaith. Dw i wrth fy modd ein bod ni'n helpu pobl. Mae wir yn rhan o achub bywydau.”

Mae pobl yn ganolog i bopeth a wnawn. Mae’r rhai sy’n gweithio ym Mwrdd Iechyd Prifysgol Caerdydd a’r Fro yn gwneud gwahaniaeth i fywydau pobl bob dydd.

Bob mis, bydd yr ymgyrch Dan Sylw yn taflu goleuni ar y gwahanol bobl sy’n rhan o BIPCAF; o’r rhai sy’n cefnogi y tu ôl i’r llenni, i’r rhai y gwnaeth eu hangerdd eu harwain at weithio yn eu rôl.

Fel sefydliad gyda dros 17,000 o gydweithwyr, bydd yr ymgyrch yn tynnu sylw at yr amrywiaeth o rolau, timau ac unigolion ar draws y bwrdd iechyd. Gall gweithio yn y GIG newid bywydau, i gydweithwyr ac i’r cleifion y maent yn eu helpu.