Claf ysbyty Caerdydd a drodd yn wirfoddolwr yn ennill gwobr genedlaethol fawreddog

Mae David White, Gwirfoddolwr Cyfeillio Cleifion ymroddedig sy'n rhan o'n Tîm Profiad y Claf ym Mwrdd Iechyd Prifysgol Caerdydd a'r Fro, wedi cael ei anrhydeddu â gwobr fawreddog Gwirfoddolwr Gofal Iechyd y Flwyddyn yng Ngwobrau Sgiliau ar gyfer Iechyd - Ein Harwyr Iechyd 2025. Mae'r anrhydedd hon yn dathlu ei gyfraniad rhyfeddol i les cleifion a chymorth cymheiriaid. 

Mae taith David yn wirioneddol ysbrydoledig. Ar ôl dioddef anaf difrifol i'r ymennydd yn 2020, cafodd sawl llawdriniaeth a blynyddoedd o adsefydlu i ailddysgu sut i eistedd, cerdded a defnyddio ei fraich chwith. Wedi'i ysgogi gan ei adferiad ei hun, gosododd David nod i ddychwelyd i'r Ward Niwroadsefydlu yn Ysbyty Athrofaol Llandochau, nid fel claf, ond fel gwirfoddolwr. Mae ei ymroddiad i gynnig anogaeth a gobaith i eraill ar deithiau tebyg wedi cael effaith sylweddol. 

Ers hynny, mae David wedi dod yn rhan annwyl ac annatod o Ward 10 y Gorllewin, gan ddefnyddio ei brofiad bywyd i gefnogi cleifion trwy eu hadsefydlu. Mae'n gweithio'n agos gyda staff i helpu i feithrin hyder a lles cleifion. Y tu hwnt i'w gefnogaeth un-i-un, mae David wedi trefnu nifer o weithgareddau cymdeithasol i roi hwb i forâl a chreu ymdeimlad o normalrwydd yn ystod arhosiad hir yn yr ysbyty. O ddathliadau Nadoligaidd i nosweithiau pizza a ffilm, mae ei ymdrechion wedi dod â llawenydd i gleifion, teuluoedd a staff fel ei gilydd, gyda rhoddion hael gan fusnesau fel Tesco a Domino's. 

Mae David yn aelod gwerthfawr o'r Tîm Profiad y Claf - Gwasanaethau Gwirfoddol, yn helpu i lunio digwyddiadau codi arian sydd ar ddod ac yn gweithredu fel llysgennad i hyrwyddo gwerth gwirfoddoli ar draws y bwrdd iechyd. Ar ôl derbyn ei wobr, mynegodd David ei ddiolchgarwch, gan ddweud, "Mae'n teimlo'n anhygoel cael fy nghydnabod a chael gwerthfawrogiad am yr hyn rydw i'n ei wneud." 

Ychwanegodd Angela Hughes, Cyfarwyddwr Cynorthwyol Profiad y Claf ym Mwrdd Iechyd Prifysgol Caerdydd a'r Fro, "Llongyfarchiadau, David, ar y gydnabyddiaeth haeddiannol hon! Mae dy ymroddiad a'th dosturi yn wirioneddol ysbrydoledig." 

Cefnogir Gwobrau Sgiliau ar gyfer Iechyd Ein Harwyr Iechyd gan NHS England, Cyflogwyr y GIG, Gwasanaethau Busnes a Rennir y GIG a Gwobrau SFJ. Ewch i'r wefan i ddarganfod mwy: www.skillsforhealth.org.uk/awards 

Mae gan y Tîm Profiad y Claf ystod o gyfleoedd gwirfoddoli ar gael ar draws Bwrdd Iechyd Prifysgol Caerdydd a'r Fro. I gael gwybod mwy, edrychwch ar dudalen we y Gwasanaethau Gwirfoddol: Gwasanaethau Gwirfoddol - Bwrdd Iechyd Prifysgol Caerdydd a'r Fro