Diweddaru Statws Uwchgyfeirio Bwrdd Iechyd Prifysgol Caerdydd a'r Fro | 15 Gorffennaf 2025

15 Gorffennaf 2025

Ar 15 Gorffennaf 2025, cyhoeddodd Ysgrifennydd y Cabinet dros Iechyd a Gofal Cymdeithasol, Jeremy Miles, fod cwmpas statws uwchgyfeirio Bwrdd Iechyd Prifysgol Caerdydd a'r Fro wedi'i ymestyn.

Roedd y Bwrdd Iechyd yn flaenorol ar Ymyrraeth wedi’i Thargedu Lefel 4 ar gyfer cyllid, strategaeth a chynllunio. Fodd bynnag, mae pryderon pellach ynghylch perfformiad, ansawdd, pwysau ariannol, diwylliant a materion gwasanaeth gweithredol wedi arwain at Ymyrraeth wedi’i Thargedu sydd bellach yn berthnasol i'r sefydliad cyfan.

Dywedodd Suzanne Rankin, Prif Weithredwr Bwrdd Iechyd Prifysgol Caerdydd a’r Fro: “Er ein bod yn siomedig gyda chwmpas estynedig yr ymyrraeth, rydym yn cydnabod y statws a’r ffactorau sy’n cyfrannu ato, ochr yn ochr â’n cyfrifoldebau ni.

“Rydym wedi ymrwymo i weithio gyda chydweithwyr a phartneriaid ar draws y system i wneud y gwelliannau sydd eu hangen i geisio llacio’r sefyllfa, a gosod llwybr gwella sefydledig.
“Mae sicrhau bod cleifion sy'n aros yr hiraf yn gallu cael mynediad at ofal yn brydlon wedi bod, ac yn parhau i fod, yn flaenoriaeth a bydd ymdrechion ar y cyd yn parhau.
Mae mynd i'r afael â phroblemau diwylliannol yn anodd ond rhaid ei wneud.

"Mae'r gwaith rydyn ni'n ei wneud i sicrhau y gall cydweithwyr leisio barn yn ddiogel, ac yn bwysicach fyth, y gweithredir ar eu hadborth, wedi bod ar y gweill ers peth amser a bydd yn parhau. Mae gweithio ar yr elfennau hyn gyda'n gilydd yn hanfodol i wella diogelwch cleifion yn ogystal â chydweithwyr.

“Fel bob amser, y blaenoriaethau allweddol o hyd yw diogelwch ac ansawdd y gofal a ddarperir i gleifion, cydweithwyr a chymunedau Caerdydd a Bro Morganwg. Drwy gydweithio mewn ffordd effeithlon, gynhyrchiol a chynaliadwy, rydym yn gwybod ei bod yn bosibl cyflawni gwelliant cynaliadwy sy'n arwain at lacio’r sefyllfa.”