Call 4 Concern | Bwrdd Iechyd Prifysgol Caerdydd a'r Fro yn cyflwyno menter diogelwch cleifion newydd, Call 4 Concern

Mae cleifion neu berthnasau ac eiriolwyr ar ran cleifion sydd yn yr ysbyty yn Ysbyty Athrofaol Cymru neu Ysbyty Athrofaol Llandochau, bellach yn gallu galw am gymorth a chyngor ar unwaith os ydynt yn pryderu am ddirywiad.

Mae Call 4 Concern yn fenter diogelwch cleifion sydd wedi’i rhoi ar waith ym Mwrdd Iechyd Prifysgol Caerdydd a’r Fro, sy’n cyd-fynd â Martha’s Rule. Mae’r gwasanaeth yn galluogi teuluoedd neu gleifion i gael mynediad at y Tîm Cleifion mewn Perygl os oes ganddynt unrhyw bryderon nad yw’r tîm gofal iechyd sylfaenol, sy’n ymwneud â gofal y claf, wedi cydnabod neu wedi ymateb i ddirywiad claf.

Os yw’r claf neu eu hanwyliaid wedi siarad â’r tîm ar y ward sy’n gofalu am y claf ac yn dal i deimlo bod ganddynt bryderon uniongyrchol, mae Call 4 Concern ar gael i deuluoedd arfer eu hawl i ofyn am ail farn.

Mae teuluoedd yn debygol o adnabod arwyddion o ddirywiad neu newid mewn cyflwr yn gynt o lawer na gweithwyr gofal iechyd proffesiynol ac, os yw hyn yn wir, mae ymyrraeth gynnar yn bwysig i sicrhau bod cleifion yn cael y cymorth gofal iechyd iawn i wella canlyniadau.

Anogir cleifion neu eu hanwyliaid i ddefnyddio Call 4 Concern os ydynt wedi siarad â’r tîm sy’n gofalu am y claf, ac yn dal i deimlo’n bryderus nad oes camau’n cael eu cymryd i gefnogi’r claf.

Drwy gysylltu â Call 4 Concern, bydd ymarferydd nyrsio o’r Tîm Cleifion mewn Perygl yn gallu cefnogi drwy gynnal adolygiad o’r claf a rhoi unrhyw gamau priodol ar waith.

Gellir cael gafael ar y tîm hwn drwy ffonio 07974 285294.

Mae’r gwasanaeth hwn ar gyfer cleifion mewnol yn unig sy’n profi dirywiad newydd yn eu hiechyd corfforol. Ar gyfer unrhyw beth arall, ffoniwch Profiad y Claf ar 02921836318 rhwng 7.30am a 4pm, Llun-Gwener. Nid yw Call 4 Concern yn wasanaeth pryderon cyffredinol.