Bwrdd Iechyd Prifysgol Caerdydd a'r Fro yn dod yn Aelod o Academi Sefydliad Florence Nightingale

19 Mai 2023

Rydym wrth ein bodd bod Bwrdd Iechyd Prifysgol Caerdydd a’r Fro bellach yn Aelod o Academi Sefydliad Florence Nightingale (FNF) —menter fyd-eang sy’n helpu i ddatblygu, cefnogi a chadw nyrsys a bydwragedd.

Sefydlwyd y FNF bron i 90 mlynedd yn ôl i gefnogi a datblygu nyrsys ledled y byd ac i wella gofal cleifion a chynnal etifeddiaeth Florence Nightingale. Lansiwyd Academi FNF yn 2020 gydag aelodaeth yn darparu gofod arloesol i nyrsys a bydwragedd o’r un anian i feithrin eu hyder i arwain — a nawr rydym yn rhan ohono.

Mae nifer o nyrsys a bydwragedd Bwrdd Iechyd Prifysgol Caerdydd a’r Fro wedi derbyn Ysgoloriaethau Arweinyddiaeth Sefydliad Florence Nightingale ac rydym yn llawn cyffro i allu cynnig cyfleoedd datblygu i bob cydweithiwr nyrsio a bydwreigiaeth drwy Academi FNF.

Gall pob nyrs, bydwraig a myfyriwr nyrsio sy’n gweithio ar draws Bwrdd Iechyd Prifysgol Caerdydd a’r Fro gael buddion aelodaeth, sy’n cynnwys yr opsiwn i wneud y canlynol:

• Datblygu gwybodaeth a sgiliau arwain trwy fodiwlau ar-lein rhad ac am ddim FNF. Mae modiwl newydd yn cael ei ychwanegu bob tri mis ac yn cyfrannu at oriau Datblygiad Proffesiynol Parhaus.
• Dylanwadu ar bolisi ac ymarfer ar heriau iechyd byd-eang trwy ein prosiectau arwain agweddau a Grwpiau Arbenigwyr Pwnc FNF.
• Dathlu ein proffesiynau ac etifeddiaeth Florence Nightingale fel VIP gyda’ch gwestai eich hun yn ein Gwasanaeth Coffáu Florence Nightingale blynyddol yn Abaty Westminster, Llundain.
• Cysylltu â mentor trwy borth ar-lein FNF Connect
• Hyrwyddo’r genhedlaeth nesaf o arweinwyr nyrsys a bydwragedd trwy enwebu arweinydd i fod yn Gymrawd Academi FNF yn flynyddol. Bydd cymrodyr yn mwynhau cyfleoedd rhwydweithio a datblygu penodol ychwanegol ac unigryw.
• Arbed drwy fynediad am bris gostyngol (gostyngiad o 10%) i wasanaeth cymorth cymheiriaid Nightingale Frontline.
• Cydweithio ag aelodau nyrsys a bydwragedd eraill yn fyd-eang trwy ein hardal aelodau ar-lein unigryw.
• Cymryd rhan mewn partneriaethau byd-eang gyda sefydliadau o wahanol genhedloedd i hwyluso dysgu a rennir a chefnogi’r gweithlu nyrsio a bydwreigiaeth byd-eang.
• Rhwydweithio a dysgu mewn gweminarau FNF yn y DU ac yn fyd-eang, mewn digwyddiadau rhithwir ac wyneb yn wyneb - a chael mynediad unigryw i wylio’r rhain ar ôl y digwyddiad. Cyfraniad gwerthfawr arall at eich oriau Datblygiad Proffesiynol Parhaus.
• Cyd-frandio eich cyfleoedd datblygu arweinyddiaeth eich hun gyda chefnogaeth ac adnoddau gan #TîmFNF.
• Cymryd rhan ym mhroses gwneud penderfyniadau'r FNF drwy ddod yn aelodau o'n strwythurau llywodraethu a rennir drwy ein Grŵp Cynghori Aelodau a'n Fforwm Cydlywodraethu. Dyma eich cyfle i osod cyfeiriad ein gweithgaredd dylanwadu polisi a dwyn yr elusen i gyfrif.
• Dysgu gyda ni trwy gyfleoedd lleoliadau ac interniaeth dewisol (hunan-reoli) gyda #TîmFNF.

Dywedodd Jason Roberts, Cyfarwyddwr Gweithredol Nyrsio Bwrdd Iechyd Prifysgol Caerdydd a'r Fro: “Rwy’n croesawu egwyddorion craidd Sefydliad Florence Nightingale yn gyfan gwbl am eu bod yn anelu’n barhaus i sicrhau rhagoriaeth mewn gofal iechyd ac rwy'n falch iawn ein bod wedi ymuno ag Academi FNF.

“Mae Academi FNF yn cynnig llawer o gyfleoedd gwerth chweil, gan gynnwys mynediad at raglenni arweinyddiaeth hyblyg ac wedi'u teilwra, cyfleoedd dysgu ar-lein arloesol a chefnogaeth amhrisiadwy gan gymheiriaid. Bydd ein cydweithrediad yn grymuso ein nyrsys a'n bydwragedd i gyrraedd uchelfannau newydd a chwyldroi gofal cleifion.

“Gyda'n gilydd, byddwn yn meithrin cenhedlaeth o arweinwyr tosturiol, arloesol a gweledigaethol a fydd yn parhau i lunio dyfodol gofal iechyd yng Nghaerdydd a'r Fro.”

Dywedodd Rebecca Aylward, Dirprwy Gyfarwyddwr Gweithredol Nyrsio Bwrdd Iechyd Prifysgol Caerdydd a’r Fro: “Mae Sefydliad Florence Nightingale yn elusen wych sy’n darparu cyfleoedd i nyrsys a bydwragedd ddatblygu eu harweinyddiaeth broffesiynol a phersonol eu hunain.

“Rydym yn falch iawn o fod yn Aelodau o’r Academi FNF ac i allu cynnig y cyfle i’n holl nyrsys, bydwragedd a myfyrwyr nyrsio gael mynediad at holl fanteision gwych yr Academi, sy’n cynnwys cyfoeth o adnoddau dysgu megis gweminarau a modiwlau ar-lein.

“Rwy’n hynod gyffrous am FNF Connect, porth ar-lein sy’n unigryw i aelodau ac a fydd yn caniatáu i unrhyw nyrs, bydwraig neu fyfyriwr nyrsio sy’n gweithio ym Mwrdd Iechyd Prifysgol Caerdydd a’r Fro gysylltu â mentor.

Ychwanegodd Rachel Morgan, Cyfarwyddwr Ymgysylltu Sefydliad Florence Nightingale: “Rydym yn llawn cyffro i groesawu Bwrdd Iechyd Prifysgol Caerdydd a Value fel aelod newydd o Academi Sefydliad Florence Nightingale.

“Mae aelodaeth yn darparu gofod arloesol ac rydym eisoes wedi eu gweld yn manteisio ar y cyfleoedd ac yn cynllunio’r ffordd orau o wneud y gorau o’r buddion. Maent yn ymuno â nifer cynyddol o sefydliadau ledled Cymru, yn wir ledled y DU, ac rydym yn siŵr y bydd eu cyfranogiad gweithredol yn galluogi nyrsys a bydwragedd ar draws eu sefydliad cyfan i gysylltu, arwain a dylanwadu ar ofal iechyd.”

Hoffem ddiolch i Elusen Iechyd Caerdydd a'r Fro am eu cefnogaeth gyda'r gost gofrestru gychwynnol.