Bwrdd Iechyd Prifysgol Caerdydd a'r Fro yn dathlu Mis Treftadaeth De Asia

17 Awst 2023

Ar 14 Awst, cynhaliodd Bwrdd Iechyd Prifysgol Caerdydd a'r Fro ddigwyddiad ar gyfer Mis Treftadaeth De Asia (18 Juli - 17 Awst), i ddathlu diwylliannau a hanesion India, Pacistan, Bangladesh, Sri Lanka, Nepal, Bhutan, a'r Maldives.

Gwnaeth Cadeirydd y Bwrdd Iechyd, Charles "Jan" Janczewski, agor y digwyddiad gan roi croeso cynnes i bawb a siarad am bwysigrwydd dathlu treftadaeth De Asia. Canmolodd Jan gydweithwyr am eu cyfraniadau i'r Bwrdd Iechyd a rhoddodd drosolwg o Fis Treftadaeth De Asia.

Roedd y digwyddiad yn cynnwys perfformiad gan griw o ddawnswyr o Deml y Shree Swaminarayan. Perfformiodd y dawnswyr ddau ddarn traddodiadol o ddawns a cherddoriaeth, Udi Udi Jaye ac yna darn hirach, Chalti, dawns garba gyflym sy'n tarddu o Gujarat yn India.

Ochr yn ochr â bwyd diwylliannol a diodydd o'r rhanbarth, rhoddodd y dathliad gyfle i gydweithwyr sydd â threftadaeth y tu allan i Dde Asia ddysgu mwy am eu cydweithwyr.

Gwnaeth Parchedig Sangkhuma Hmar, caplan yn y Bwrdd Iechyd, fyfyrio ar ei daith i'r DU ac i weithio yn y GIG; gan roi hanes diddorol ei gefndir yng Ngogledd-ddwyrain India.

Yn ogystal, gwnaeth Tayyeb Tahir, seiciatrydd cyswllt, rannu ei brofiad o weithio o fewn y GIG, gan dynnu sylw at ei waith gyda ffoaduriaid a meddygon tramor sy'n dod i'r DU i ddatblygu eu hyfforddiant.

Sefydlwyd y digwyddiad hwn gan Rwydwaith Un Llais BIP Caerdydd a'r Fro, sy'n cynrychioli staff o gefndiroedd du a lleiafrifoedd ethnig. Nod digwyddiadau o'r fath yw tynnu sylw at bwysigrwydd amrywiaeth a chynhwysiant o fewn y GIG, a chyfraniad gwerthfawr cydweithwyr ar draws pob ethnigrwydd. Bydd y rhwydwaith yn parhau i drefnu digwyddiadau tebyg yn y dyfodol.