Aelodau Tîm Iechyd y Cyhoedd i ymgymryd â her anodd 10YFan ar gyfer elusen
Mae dau aelod o Dîm Iechyd y Cyhoedd Caerdydd a'r Fro yn mynd i wisgo eu hesgidiau cerdded ac ymgymryd â her dringo mynydd anodd iawn ym mis Mai eleni, er budd elusennol.
Mae’r Ymarferydd Hybu Iechyd Kim Wilyman, ynghyd â’r Ymarferydd Iechyd y Cyhoedd Lauren Thomas, wedi cofrestru i wneud her 10YFan sy’n cynnwys dringo Pen y Fan 10 gwaith mewn 24 awr.
Mae dringo’r mynydd 2,907 troedfedd o uchder sydd yn ardal brydferth Bannau Brycheiniog 10 gwaith yn cyfateb i ddringo i ben Everest sy’n amlygu maint anferthol yr her.
Bydd yr holl arian a godir gan y ddau unigolyn yn mynd tuag at Elusen Iechyd Caerdydd a’r Fro, yr elusen swyddogol sy’n cefnogi holl wardiau ac adrannau Bwrdd Iechyd Prifysgol Caerdydd a’r Fro.
“Mae’n mynd i fod yn brawf ffitrwydd, penderfyniad a grym ewyllys,” meddai Lauren. “Rwy’n barod am yr her, ac os gallaf gwblhau 10 yna ffantastig – ond yn bendant nid yw hyn yn rhywbeth yr wyf wedi arfer ei wneud. Rwy'n gobeithio y bydd fy ngliniau'n parhau i weithio!"
Mae Kim, sydd wedi cwblhau sawl ultra-marathon yn ystod yr ychydig flynyddoedd diwethaf, wedi bod yn chwilio am her newydd. Dywedodd: “Roeddwn i’n arfer gweithio fel nyrs yn Ysbyty Athrofaol Cymru, felly bydd yn hyfryd rhoi rhywbeth yn ôl i Elusen Iechyd Caerdydd a’r Fro sy’n gwneud cymaint dros gleifion a staff.
“Fy mhryder mwyaf yw’r swm o amser y byddwn yn dringo, a’r agwedd feddyliol o geisio dal ati. Ond dwi'n gwybod y byddwn ni'n sbarduno ein gilydd ac yn gwneud yn siŵr bod morâl yn uchel.
“Mae’n rhywbeth y byddwn ni’n bendant yn ei gofio am amser hir, yn enwedig os ydyn ni’n cael machlud haul a thoriad gwawr hyfryd. Gobeithio y bydd yn ddiwrnod clir.”
Os bydd y tywydd yn braf, bydd y pâr yn cychwyn yn gynnar gyda'r nos ddydd Sadwrn, 10 Mai ac yn parhau i gerdded trwy'r nos ac i mewn i'r diwrnod canlynol.
Bydd pob cyfranogwr yn penderfynu sawl gwaith y byddant yn dringo’r mynydd o fewn 24 awr. Ar hyn o bryd, mae tîm o wyth wedi dewis cymryd rhan yn 10YFan ar gyfer Elusen Iechyd Caerdydd a'r Fro.
Os hoffech gefnogi'r tîm a rhoi, ewch i'r dudalen we JustGiving hon.
I gael gwybod mwy am Elusen Iechyd Caerdydd a'r Fro, sy'n rheoli mwy na 300 o gronfeydd ar gyfer offer, ymchwil, triniaeth a gofal cleifion, ewch i'w gwefan.