Adran Gofal Critigol Ysbyty Athrofaol Cymru yn cael Achrediad Mawreddog

Mae’r Adran Gofal Critigol (CCD) yn Ysbyty Athrofaol Cymru wedi cyflawni carreg filltir ryfeddol drwy gael achrediad Sicrwydd Ansawdd gan Gymdeithas Ecocardiograffeg Prydain o dan ei Fframwaith Ansawdd Ecocardiograffeg.

Mae ecocardiograffau yn chwarae rhan hanfodol mewn gofal critigol, gan eu bod yn helpu i sicrhau bod cleifion mwyaf sâl y Bwrdd Iechyd yn gallu cael gafael yn effeithiol ar ddull cywir o roi diagnosis ar gyfer cyflyrau penodol a’u monitro.

Er mwyn cyflawni'r achrediad hwn, sefydlodd y tîm Gofal Critigol safonau gofynnol ar gyfer adroddiadau ac adolygiadau cleifion, gan gynnal archwiliadau rheolaidd ac adolygiadau gan gymheiriaid ar gyfer gwelliant cydweithredol ynghyd â buddsoddi mewn offer a seilwaith i sicrhau cynaliadwyedd. Mae'r uned hefyd wedi cynyddu nifer y cydweithwyr sydd wedi'u hyfforddi mewn hyfedredd ecocardiograffeg o bump i 17, sef cynnydd o 240%.

Fel yr unig Uned Gofal Critigol yng Nghymru, ac un o ddim ond nifer fach yn y DU i gyflawni'r achrediad hwn, mae hyn yn dangos ymrwymiad y Bwrdd Iechyd i ddarparu gofal o'r ansawdd uchaf i'w gleifion, ond hefyd i ddatblygiad proffesiynol parhaus cydweithwyr clinigol.

Dywedodd Dr Chris Gough, Meddyg Ymgynghorol Gofal Dwys: “Mae’r achrediad hwn yn dyst i ymroddiad a gwaith caled ein tîm cyfan o fewn Gofal Critigol. Rydym yn cydnabod pwysigrwydd clinigol cynnal ecocardiograffeg a’r hyn y mae’n ei olygu i’r gofal a ddarparwn i’n cleifion ac mae’r clod hwn yn sail i’n hymrwymiad i ddarparu gofal o’r ansawdd uchaf er mwyn sicrhau’r canlyniadau gorau posibl i’n cleifion.”

Dywedodd Bex Parsons, Ecoffisiolegydd Clinigol Arweiniol ar gyfer Gofal Critigol: “Mae’r cyflawniad hwn yn anhygoel i Adran Gofal Critigol, sy’n gweithio’n wahanol iawn i glinig cleifion allanol. Rydym wedi gorfod dangos bod ein hymarfer y tu hwnt i ofal safonol mewn gwirionedd, a’n bod yn darparu gwasanaeth eithriadol i’n cleifion, ac rwy’n falch o ddweud ein bod wedi’i gyflawni.”

Mae Fframwaith Ansawdd Ecocardiograffeg Cymdeithas Ecocardiograffeg Prydain yn ddull cynhwysfawr sy'n canolbwyntio ar y claf o sicrhau ansawdd a gwella gwasanaethau'n barhaus.