Barn ein Prentisiaid a Staff

Dewch i gwrdd â rhai o’r cydweithwyr sydd wedi cwblhau prentisiaethau gyda Bwrdd Iechyd Prifysgol Caerdydd a’r Fro...

Roedd Lauren Dando yn gweithio yn y maes manwerthu cyn cwblhau prentisiaeth gyda'r Bwrdd Iechyd. Gwnaeth gais oherwydd ei bod hi “eisiau gweithio mewn sector sy’n gwneud gwahaniaeth gwirioneddol i fywydau pobl”. Gwelodd Lauren brentisiaeth fel y bont berffaith rhwng ei sgiliau gwasanaeth cwsmeriaid presennol a gyrfa hirdymor mewn gweinyddiaeth yn y GIG.

Roedd Lauren yn gwerthfawrogi'r cyfle i ddysgu yn y gwaith, gyda phrofiad ymarferol. “Does dim cymaint o bwysau i wybod popeth o’r dechrau,” eglura hi, “rydych chi’n cael amser i ddysgu, datblygu eich sgiliau, a magu hyder yn eich rôl.”

Gyda chymorth ei rheolwr a chydweithwyr eraill, mae Lauren bellach yn gweithio fel Gweinyddwr i'r Tîm Diogelwch ac mae hefyd yn helpu yn yr Ystafell Rheoli Diogelwch pan fo angen.

Mae prentisiaeth Lauren wedi agor ei llygaid i'r gwahanol lwybrau gyrfa sydd ar gael, ac mae hi'n anelu at gymryd mwy o gyfrifoldeb, gan symud i reoli prosiectau ac yn y pen draw i rôl weinyddol uwch.

“Os ydych chi’n chwilio am yrfa werth chweil gyda rhagolygon cryf, mae prentisiaeth y GIG yn ddewis gwych” meddai hi.

Cyn dechrau ei brentisiaeth gyda Bwrdd Iechyd Prifysgol Caerdydd a'r Fro, nid oedd gan Diogo lwybr clir at yrfa sefydlog a boddhaus.

Gan chwilio am waith ystyrlon gyda datblygiad proffesiynol, gwnaeth Diogo gais am brentisiaeth gyda'r tîm Addysg Feddygol (MedEd) yn y Bwrdd Iechyd. Drwy gadw mewn cysylltiad rheolaidd, dilyn canllawiau clir, a chael hyfforddiant yn y swydd llwyddodd Diogo i fagu hyder ac yn fuan iawn daeth yn aelod amhrisiadwy o'r tîm.

Canfu Diogo fod y broses brentisiaeth yn hynod werth chweil, “Rydw i wedi teimlo fy mod i’n cael fy ngwerthfawrogi drwyddi draw, ac mae’r gwaith rydw i wedi’i wneud wedi cael effaith wirioneddol” meddai. “Mae’n ffordd wych o ddatblygu eich sgiliau wrth gyfrannu at rywbeth ystyrlon.” Mae'n edrych ymlaen at barhau â'i ddatblygiad a gwneud gwahaniaeth gwirioneddol ymhlith y tîm.

Dywedodd rheolwr llinell Diogo: “Daeth Diogo â thalent ac egni newydd i’n tîm. Fe wnaeth ei safbwynt ffres ein helpu i ddiweddaru systemau sefydledig, a gafodd eu rhoi ar waith ar raddfa ehangach wedyn. Mae ei wylio'n tyfu mewn hyder a gallu wedi bod yn hynod werthfawr. Mae ei daith hyd yn oed wedi ysbrydoli eraill yn y tîm i ddilyn eu cyfleoedd datblygu eu hunain.”

Dechreuodd Kimberley Chagweta ei gyrfa yn y GIG yn 19 oed, yn fuan ar ôl symud i'r DU o dramor.

Cwblhaodd Kimberley ei chymhwyster Lefel 2 mewn Gweinyddu Busnes wrth weithio mewn practis meddyg teulu ac mae bellach yn cwblhau ei chwrs Lefel 3 ochr yn ochr â'i rôl weinyddol ddiweddaraf gyda Gwasanaeth Genomeg Meddygol Cymru Gyfan.

Mae cyfarfodydd rheolaidd gyda'i hasesydd ac adborth parhaus fel rhan o'i chyrsiau prentisiaeth wedi ei helpu i gymhwyso'r hyn mae wedi'i ddysgu i'w chyfrifoldebau dyddiol, ac mae ei phrentisiaeth wedi ennyn diddordeb dyfnach mewn gyrfa hirdymor yn y GIG, yn enwedig mewn nyrsio.

Mae natur dosturiol Kimberley yn amlwg i’w chydweithwyr, yn enwedig pan mae hi’n rhyngweithio â chydweithwyr a chleifion. Mae ei phrosiectau prentisiaeth wedi arddangos ei sgiliau technegol a chyfathrebu, sydd wedi rhoi hwb i hyder Kimberley mewn lleoliad gweinyddu busnes ac wedi ysbrydoli datblygiad proffesiynol pellach.