Cymhlethdodau HPN

Rhwystr yn y llinell

Fel arfer, mae rhwystr yn y llinell yn digwydd pan fydd gweddillion yn cronni mewn llinell a gall gael ei achosi pan na fydd y llinell yn cael ei fflysio’n ddigonol neu gall rhywbeth arall ei achosi. Er mwyn helpu i atal rhwystr, caiff y llinell ei fflysio â thoddiant halwynog ar ôl pob trwythiad a chydag alcohol unwaith yr wythnos. Os yw'ch pwmp yn parhau i roi rhybudd sy’n dweud 'downstream occlusion' neu os byddwch chi'n sylwi ar rywfaint o wrthwynebiad neu falŵn wrth fflysio'ch llinell neu os nad ydych chi'n gallu fflysio'ch llinell yn llwyr, efallai bod eich llinell wedi'i rhwystro. Ni ddylech ddefnyddio grym na cheisio clirio’r llinell eich hun gan y gallai hyn achosi i'r llinell rwygo. Efallai y bydd modd clirio’r llinell gyda thriniaeth arbenigol a dylech gysylltu â’r tîm heb oedi.

Toriad neu rwyg yn y llinell

Fel arfer, mae toriad, rhwyg neu dwll yn digwydd oherwydd traul gan achosi gwendid yn y llinell. Er mwyn atal traul ar unrhyw ran o'r llinell a allai ei gwanhau ac achosi iddi hollti, dylid symud y clamp yn rheolaidd ar hyd rhan fwy trwchus y llinell. Os yw'r toriad y tu mewn i'ch corff efallai y byddwch yn sylwi ar boen neu chwydd pan fyddwch yn fflysio neu'n trwytho'ch HPS neu efallai y byddwch yn sylwi ar dwll yn eich llinell neu'n gweld hylif yn gollwng o'r llinell os yw'r toriad y tu allan i'r corff.

Mae'n bwysig eich bod yn sicrhau bod y llinell yn gadarn yn ei lle er mwyn lleihau'r risg o haint. Dylech chi roi clamp glas rhwng y toriad/rhwyg a’r man lle mae’r llinell yn dod allan ar eich brest a gorchuddio pen y llinell ac o amgylch y toriad/rhwyg â rhwyllen. Yn aml mae'n bosibl atgyweirio'r llinell ac os nad yw hyn yn bosibl bydd angen gosod llinell newydd a dylech gysylltu â'r tîm heb oedi.

Haint yn y Llinell

Mae sawl math o haint llinell, a dylech gysylltu â'r tîm os ydych chi'n profi unrhyw symptomau.

Haint yn y twnnel neu’r man lle mae’r llinell yn dod allan

Gall hyn ddechrau fel llid neu gochni'r croen wrth y man lle daw’r llinell allan, ac mae’n bosib y bydd hylif serws neu grawn yn gollwng. Os na chaiff ei drin ar unwaith, gall yr haint deithio o dan y croen a mynd yn goch iawn, yn chwyddedig ac yn boenus. Yn aml mae'n rhaid tynnu'r llinell, ac efallai y bydd angen triniaeth arnoch a bydd angen i chi gael eich derbyn i’r ysbyty am gyfnod o 10-14 diwrnod.

Haint yn y llinell a’r llif gwaed

Mae hyn o ganlyniad i ficro-organebau yn mynd i mewn i'ch llinell. Gellir dod o hyd i ficro-organebau yn yr amgylchedd a dŵr yn ogystal ag ar y croen. Weithiau, os nad ydych chi'n ofalus, gall y micro�organebau hyn ganfod ffordd i mewn i'ch llinell ac achosi haint. Er y gallwch ddatblygu haint o ganlyniad i beidio â gofalu am y llinell yn briodol, mae ffactorau eraill a allai gyfrannu ato fel haint mewn man arall yn eich corff sydd wedi mynd i mewn i'ch llinell.

Er mwyn lleihau'r risg o haint wrth i chi ofalu am eich llinell, gofynnwn i chi ddilyn y cyngor hwn: diffoddwch ffans, caewch ffenestri a gwnewch yn siŵr nad oes neb yn gwneud unrhyw beth o'ch cwmpas a allai chwythu neu godi llwch sy'n cynnwys micro-organebau, fel hwfro neu baratoi’r gwely. Cadwch anifeiliaid anwes allan o'r ystafell a gwnewch yn siŵr bod eich dwylo'n hollol sych i atal gronynnau dŵr rhag diferu ar eich maes di-haint.

Os oes gennych chi dymheredd, yn profi cryndod wrth fwydo (rigors), curiad neu anadlu cyflym ac/neu’n teimlo'n sâl iawn, mae'n bosibl bod gennych chi haint yn y llinell. Dylech atal eich trwythiad ar unwaith a chysylltu â'ch NST yn ystod oriau gwaith neu os ydych chi'n sâl iawn ewch i'r adran achosion brys yng Nghaerdydd neu ffoniwch 999. Bydd angen i chi gael eich derbyn i'r ysbyty i gael triniaeth gyda gwrthfiotigau mewnwythiennol, ac yn dibynnu ar y micro-organeb a'ch cyflwr clinigol efallai y bydd angen tynnu'r llinell neu ei hadfer. Mae'n debygol y byddwch yn glaf mewnol am 10-18 diwrnod yn dibynnu ar ba driniaeth sy'n briodol. Mae'n hanfodol eich bod yn cysylltu â'r NST cyn gynted â phosibl ar yr arwyddion cyntaf posibl o haint. Os cewch eich derbyn gyda haint yn y llinell, bydd nyrs maeth yn ailasesu eich triniaethau chi neu rai eich perthynas os nad ydych chi'n annibynnol.

Llinell yn mudo

Mae eich llinell twnnel wedi'i dal i mewn gyda chyff ffibrog bach o'r enw cyff Dacron. Os oes gennych chi linell PICC yna efallai bod gennych chi ddyfais statlock neu griplock neu securacath i'w dal yn ei lle. Pe bai eich llinell yn dod yn rhydd, gallai olygu bod eich llinell yn y safle anghywir ar gyfer bwydo. Os byddwch chi'n profi teimlad anarferol yn eich gwddf neu'ch brest wrth ddefnyddio'ch llinell, yn clywed sŵn chwiban yn eich clust ar yr un ochr â'ch llinell neu os yw'ch llinell yn ymddangos yn hirach neu wedi symud, dylech osgoi defnyddio'ch llinell a chysylltu â'ch NST ar unwaith.

Cymhlethdodau biocemegol

Bydd eich profion gwaed neu fiocemeg yn cael eu monitro'n rheolaidd, a bydd eich trwythiad yn cael ei addasu yn ôl yr angen yn dibynnu ar y canlyniadau, eich cyflwr clinigol a'ch cydbwysedd hylifau. Bydd yn llai aml pan fyddwch chi gartref. Rhaid i chi hysbysu'r NST os nad ydych chi'n derbyn eich holl drwythiad rhagnodedig gan y gallai hyn effeithio ar eich triniaeth. Gall chwyddo yn y fferau neu'r coesau a bod yn fyr o anadl olygu eich bod chi'n cael gormod o hylif, a gallai bod yn sychedig, yn ddryslyd, yn flinedig, yn pasio ychydig o wrin neu wrin crynodedig, neu brofi crampiau yn y cyhyrau ddangos eich bod chi wedi dadhydradu. Os ydych chi'n teimlo'n sâl neu'n benysgafn ar ôl eich trwythiad, mae’n bosibl bod y trwytho’n rhy gyflym neu wedi cael ei atal yn rhy sydyn. Mae'n bwysig eich bod yn rhoi gwybod i'r tîm am unrhyw sgil-effeithiau rydych chi'n eu profi sy'n gysylltiedig â'ch trwythiadau.

Weithiau nid yw'r trwythiad yn gallu darparu'r holl faetholion sydd eu hangen arnoch, ac efallai y bydd angen trwythiadau ychwanegol arnoch fel haearn neu bigiadau fitamin D a B12. Efallai y byddwch hefyd yn cael presgripsiwn ar gyfer atchwanegiadau fitamin a mwynau i’w cymryd drwy’r geg.

Gall HPN hirdymor olygu eich bod mewn mwy o berygl o osteoporosis neu esgyrn brau. Bydd sgan esgyrn (Dexa) yn cael ei wneud bob 2-3 blynedd i fonitro hyn. Gall triniaeth gynnwys atchwanegiadau drwy’r geg neu therapi mewnwythiennol.

Hyper/hypoglycaemia

Yn dibynnu ar eich ffactorau risg sylfaenol, gall hyper/hypoglycemia (lefelau glwcos gwaed isel/uchel) ddigwydd os ydych chi ar TPN. Oherwydd lefelau glwcos yn eich TPN, gall y siwgr yn eich gwaed naill ai fynd i fyny tra byddwch chi'n cael eich bwydo neu i lawr pan nad ydych chi'n cael eich bwydo. Os bydd hyn yn digwydd, efallai y byddwch chi'n profi syched gormodol, eisiau pasio dŵr yn aml a/neu olwg aneglur. Dylech hysbysu'ch tîm gofal iechyd os bydd hyn yn digwydd gan fod ffyrdd syml o atal hyn rhag digwydd fel newid y cynnwys glwcos yn eich trwythiad, addasu inswlin, bwydo am gyfnod hirach neu newid cyfradd TPN dros yr ychydig oriau cyntaf neu olaf. Gelwir hyn yn rampio i fyny neu i lawr. Bydd ein nyrsys yn dangos i chi sut i wneud hyn.