Ydy gwasanaethau CAMHS ar gael o hyd?
Mae ein gwasanaeth CAMHS wedi parhau i weithio gyda phlant a phobl ifanc ers dechrau pandemig y coronafeirws. Bu angen i ni newid y ffordd rydym yn cynnal ein gwasanaeth i gydymffurfio â rheolau'r Llywodraeth. Rydym yn dechrau cynorthwyo llawer o'r bobl ifanc rydym yn eu gweld naill ai trwy ymgynghoriadau rhithwir neu dros y ffôn. Pan fu angen clinigol i weld rhywun yn bersonol, rydym wedi gwneud hyn, gan ddilyn y canllawiau ar gadw pellter cymdeithasol.
Rydym wedi cynnal nifer o asesiadau risg ym mhob un o'n clinigau ac wedi dechrau cyflwyno mwy o ymgynghoriadau wyneb yn wyneb lle nad oes modd darparu ymyrraeth therapiwtig o bell. Fodd bynnag, mae angen i'r GIG barhau i ddilyn y mesurau cadw pellter cymdeithasol, ac mae'n ofynnol yn genedlaethol i bob ymgynghoriad gael ei gynnal o bell oni bai bod angen clinigol iddo gael ei gynnal wyneb yn wyneb. Mae hyn yn golygu nad yw'r un faint o bobl ag arfer yn gallu bod yn y clinigau, ac felly mae angen i ni flaenoriaethu pa bobl ifanc i'w gweld yn bersonol. Gall hyn achosi oedi anochel a mwy o amser aros. Gofynnwn i unrhyw un sy'n cysylltu â'n gwasanaethau fod yn ystyriol o'n staff y mae angen iddynt wneud penderfyniadau anodd ar yr adeg hon ac sy'n gweithio'n ddiflino i weld cynifer o blant a phobl ifanc â phosibl.
I wneud yn siŵr ein bod yn dilyn canllawiau'r llywodraeth, rydych yn debygol o weld rhai newidiadau pan fyddwch yn ymweld â ni nesaf. Dyma rai negeseuon allweddol:
- PEIDIWCH â dod i safle Canolfan Blant oni bai y dywedwyd wrthych chi'n benodol am wneud hynny. Byddwch wedi cael gwybod am drefniadau penodol gan eich Tîm CAMHS lleol neu yn eich llythyr apwyntiad. Os ydych yn ansicr, cysylltwch â'ch Tîm lleol i gael cymorth.
- PEIDIWCH â dod i'ch apwyntiad os ydych yn sâl a/neu os oes gennych symptomau'r coronafeirws. Mae rhagor o wybodaeth am symptomau'r coronafeirws a beth i'w wneud ar gael yn: https://www.nhs.uk/conditions/coronavirus-covid-19/symptoms/
- Gan ein bod yn derbyn nifer uwch o lawer o alwadau ffôn, fe allai gymryd mwy o amser i ni ymateb i chi. Eglurwch yn eich neges os yw'ch ymholiad yn frys, a byddwch yn ystyriol ac yn amyneddgar gyda'n staff - maen nhw'n gwneud popeth y gallant.
- Os teimlwn fod angen i ni weld eich plentyn yn bersonol, bydd hyn yn cael ei drafod gyda chi a bydd y mesurau y mae angen eu cymryd i'ch cadw chi a'n clinigwyr yn ddiogel yn cael eu hesbonio.
- Os ydych yn ansicr beth yw'ch cynllun gofal, ffoniwch y gwasanaeth.
- Bydd arsylwadau iechyd corfforol (taldra, pwysau, pwysedd gwaed, curiad y galon a thymheredd) yn parhau i gael eu gwneud dim ond os yw hynny'n gwbl hanfodol. Trafodwch gyda'r clinigydd os oes angen hyn.
- Dim ond os oes arnoch angen sylw meddygol brys y dylech fynd i'r Adran Damweiniau ac Achosion Brys (A&E).
- Gallwch fod yn sicr bod eich clinigydd wedi datgan ei fod yn ddigon iach i fod yn y gwaith ac y bydd yn dilyn y canllawiau cadw pellter cymdeithasol (cynnal pellter o oddeutu 2 fetr) ac yn golchi ei ddwylo'n rheolaidd.
Os ydym wedi cytuno bod angen i chi gael eich gweld yn bersonol, dyma rai enghreifftiau o'r pethau a allai fod yn wahanol:
- Dilyn trefniadau newydd wrth ddod i'r clinig, er enghraifft ffonio'r clinig wrth gyrraedd neu cyn mynd i mewn i'r adeilad. Bydd y trefniadau lleol yn cael eu cadarnhau gyda chi cyn eich apwyntiad.
- Defnyddio hylif diheintio dwylo wrth fynd i mewn i'r adeilad.
- Dilyn mesurau cadw pellter cymdeithasol. Bydd mwy o arwyddion yn y clinig sy'n esbonio'r broses, gan gynnwys y posibilrwydd o systemau unffordd.
- Eistedd ymhellach i ffwrdd yn ystafelloedd y clinig.
- Gallai rhai aelodau staff fod yn gwisgo masgiau.